CEBU, Philippines – Ang hepe sa Cebu City Environmental Sanitation Enforcement Team (Ceset), mipahibalo nga ipakatap niya sa lainlaing dapit sa Sinulog carousel route ang kapin sa 400 niya ka sakop aron manakop sa masakpan nga magpataka lang paglabay sa ilang mga sagbot.
Giangkon hinuon ni Grace Luardo nga dili g’yud nila masakpan ang tanang malapason sa lagda sa ordinansa sa dakbayan. Gipadad-an nang daan ni Luardo og mga paskin ang lainlaing mga tindera, bisan kadtong wala sa rota sa parada, nga katungdanan nila ang paglimpyo sa ilang palibot.
Samtang ang kadagkoan sa Department of Public Services (DPS) nangandam na usab sa dako nilang tahas karong Domingo nga mao ang paghipos dayon sa mga basura human gyud sa parada. Matud ni Engr. Rolly Ardoza nga maoy pangulo sa Department of Public Services (DPS) nga paningkamotan nila nga kaadlawon pa lang sa Enero 18, limpyo na ang tanang kadalanan sa dakbayan sa Sugbo.
Naandan na sa City Hall nga mohatag og pahalipay sa mga kawani nga moapil sa pinaspasay pagpanilhig sa mga sagbot inighuman gyud sa parada.
Samtang subli nga gibauran kadtong gusto nga mamaligya’g mga makaon, bisan unsa nga mainom ug uban pa nga baligya diha sa rota nga agian sa Sinulog Grand Parade karong sunod Domingo, kinahanglang mokuha sila og permiso aron dili sakmiton ang ilang mga baligya.
Mao kini ang pahibalo sa kadagkoan sa Sinulog Foundation Incorporated (SFI) aron madestino nila ang mga maninda og dapit nga dili sila makahasol sa mga tawo nga manan-aw sa pasundayag atol sa kapistahan ni Señor Santo Niño. Ang mga sakop sa PROBE Team sa City Hall maoy gitahasan pag-aksyon sa mga malapason sa lagda.
Si Ricky Ballesteros nga maoy executive director sa Sinulog Foundation Inc. mipasabot nga ang tumong niini aron nga hapsay ang rota nga anha moagi ang Sinulog Parade.
Giawhag usab sa Sinulog Foundation Inc. ang mga tag-iya og balay-patigayon nga anaa daplin sa rota nga agian sa parada nga mopagamit sila sa ilang mga pansayan, ug gitugotan sila pagkolekta og bayad sa mga mogamit.
Ang dakbayan adunay mga portable toilets apan dili kini makasapar sa kaliboan ka tawo nga mogamit sa mga comfort rooms.
Kandidato
Ang mga campaign staff sa mga kandidato gipasidan-an usab nga dili mopahimulos sa higayon pinaagi sa pagpakatap og campaign posters sa ilang mga kandidato.
Ang PROBE team gitahasan sa pagtangtang sa bisan unsa nga propaganda materials, bisan ang mga propaganda sa mga negosyo, kun anaa kini gibutang sa parade route nga walay permit.
Adunay ubang kandidato nga mosakay sa mga float nga gipanag-iya sa ilang mga higala nga magpapatigayon ug sila gidid-an usab sa pagpanghatag og mga produkto nga makapagubot lang sa parada.
Ilimnon gidili
Ang mga tindahan, ilabi na ang mga ambulant vendors nga maninda sa daplin sa karsada, gidid-an usab sa pagbaligya og mga makahubog nga ilimnon sama sa beer.
Sa nangaging katuigan, grupo sa mga anak og Balikbayan ingon man adunahang pamilya, nag-inom daplin sa parade route sa General Maxilom Avenue atbang sa karaang Rustans.
Ang dakbayan sa Sugbo adunay ordinansa nga nagdili sa pag-inom ug sa paghubog diha sa publiko nga mga lugar. Samtang ang rota sa Sinulog Parade gidili ang pagbutang og plataporma, apil ang mga sakyanan, nga katungtongan sa mga manan-aw.
Ang General Maxilom Avenue lapad na hinuon kaayo kay gikuha na kaniadtong miaging tuig ang mga semento nga road separators nga gibutang taliwala sa karsada nga makapugong sa mga dancers sa pagsayaw.
Fireworks display
Kapin lang hinuon sa 30 ka dancing contingents ang nagpalista nga mosalmot sa pagsayaw, apan duna pay mga higante, float, puppets nga makalingaw usab kaayo sa mga mosaksi.
Sama sa naandan ang carousel route mao ang P. del Rosario Street ngadto na sa Imus Road, unya subay sa Imus Road ug liko paingon sa General Maxilom Avenue ngadto na sa Fuente Osmeña.
Gikan sa Fuente Osmeña, mosubay na usab sa Osmeña Boulevard ug liko sa tuo, pasulod na sa Cebu City Sports Center. Ang matag contingents ikatag sa lainlaing bahin sa carousel route ug kun asa sila magsugod pagsayaw, adto usab sila motapos.
Matud ni Ballesteros nga iyang bana-bana mga alas siete sa gabii mahuman na ang Sinulog Parade ug kasugdan na ang mabulokon nga finale nga giandam adto sa Cebu City Sports Center. Dayon taposon ang kalihukan pinaagi sa maanindot nga fireworks display. ((BANAT NEWS) )