CEBU, Philippines – Planuhon ug kinahanglan ang taas nga pasensiya sa huot sa trapiko atol sa 51st International Eucharistic Congress sa Sugbo.
Kini ang hangyo ni Arsobispo Jose Palma sa publiko human gipresentar sa traffic officials sa Metro Cebu ang ila’ng mga plano ug rerouting scheme.
Ang Pope John Paul II Avenue, ilabi na ang kinatibuk-ang dalan gikan sa F. Cabahug sa Mabolo ngadto na sa Technical Education and Skills Development Authority (TESDA) sirad-an gikan sa alas 5 ngadto na sa alas 9 sa buntag ug alas 2 sa hapon ngadto na sa alas 7 sa gabii gikan sa Enero 24 hangtud 30.
Kadto lang mga IEC buses, coaster ug private vehicles nga adunay passes ang tugutan nga makaagi padulong sa IEC Pavilion.
Ang Arsobispo niawhag sa mga Sugbuanon sa paghatag og mainitong pagtimbaya sa mga delegado sa IEC nga mahitabo matag upat ka tuig. Atol sa Opening Mass karong Enero 24, ang dalan sa Plaza Independencia sirad-an ug dili paagian sa tanang klase sa sakyanan gikan sa alas 2 sa hapon hangtud nga mahuman ang kalihukan.
Pipila usab ka dalan ang sirad-an atol sa Visita Iglesia karong Enero 28 nga magsugod gikan sa alas 7 sa gabii aron paghatag og dalan sa mga delegado nga mobisita sa pito ka parokya sa siyudad.
Sa Enero 29, ang dalan atubangan sa Capitol sirad-an gikan sa ala una sa kadlawon aron paghatag sa mga organizers og higayon nga maka-preparar sa ila’ng mga gamit sama sa wide screens ug kahimanan alang na sa open air mass atubangan sa Kapitolyo.
Mga dalan nga duol sa mao’ng dapit ang pasirad-an sa Enero 29 ug ang Osmeña Boulevard off-limits usab sa tanang sakyanan atol sa Eucharistic Procession nga maggikan sa Kapitolyo paingon sa Plaza Independencia.
Sa Enero 30, ang mga dalan nga nakapalibot sa Cebu City Sports Center sirad-an aron paghatag og agianan sa First Communion sa 5 mil ka batan-on. Dunay road closure atol sa Closing Mass diha sa South Road Properties udto sa Enero 31 diin ang mga truck, trailers gidid-an sa pag-agi sa SRP aron malikayan ang kahuot sa dagan sa trapiko.
Ang truck ban sa SRP sa Enero 31 magsugod sa alas 12 sa udto hangtud mahuman ang kalihukan.
Ang Cebu City Transportation Office mamutang og traffic advisories isip tamdanan sa mga motorista.
Samtang 99 porsiyento na nga andam ang transportation committee alang sa IEC nga gipangulohan ni Fr. Wendell Balbuena kinsa nipahibawo nga makanunayon ang coordination meeting tali sa tulo ka Dakbayan sa Sugbo, Mandaue ug Lapu-Lapu aron mahimo’ng hapsay ug malinawon ang pagkarga ug pagdiskarga sa mga moapil sa IEC.
Aduna’y 110 ka bus nga giandam ug gibahin sa tulo ka dakbayan ug may sakay nga tour guides ug sakop sa kapolisan aron safety kanunay ang mga delegado sa pagdulong sa mga venues ug sa ila’ng pag-uli sa tagsa-tagsa ka puy-anan. Matud usab ni Balbuena nga nagkinahanglan sila sa hiniusa nga pagsabot sa katawhan ilabi na kahuot unya sa kadalanan nga sirad-an.
Awhag lang gyud nila sa katawhan nga ipatigbabaw ang pagka-maayo’ng Sugbuanon ug ang pagka-mapaubsanon alang sa kalampusan sa kalihukan. (Decemay P. Padilla ug Rowena D. Capistrano/GMR)(BANAT NEWS)