CEBU, Philippines – Liboan ka mga deboto sa Senyor Sto. Niño ang gipaabot nga moduyog sa prosisyon karong buntaga alang sa Walk with Jesus nga manukad sa Fuente Osmeña Rotunda padung sa Basilica Minore del Sto.Niño.
Di momenus 250 ka polis ang ipakatap sa rota matud pa ni City Police Director Senior Superintendent Marciano Batiancela Jr. sa pakighinabi sa mga tigbalita.
Gawas sa kapolisan motabang sab ang mga barangay tanod, barangay intelligence networks ug mga citizen volunteer organization sa pagbantay.
Matud pa niya nga bahinon sa upat ka sektor ang mga polis ug mga force multipliers aron hapsay kini ug way mga panghitabo nga makabalda sa kalihokan.
Gihangyo sa kapolisan nga kun di kinahanglan, di na lang magdala og mga talinis nga payong, backpacks ug uban pa nga makasamad ug makabalda sa mas paspas nilang pagsulod sa pilgrim center.
Samtang mipahinumdom sad si Batiancela sa ubang relihiyosong denominasyon nga respetohon ang kalihokan sa Simbahang Katoliko aron dili sila mapasakaan og kaso.
Sa miaging tuig gidakop sila si Michael Bradley, 46, taga Florida USA, iyang asawa nga si Elcel Bradley, 38, taga-Palawan ug si Rebecca Muñoz, 29, tungod sa kalapasan sa Article 132 and 133 sa Revised Penal Code kon ang “interruption of religious worship and offending religious feelings.”
Apan gibuhian ra sila sa kanhi hepe sa Police Station 2 nga si Chief Inspector Wildemar Tiu human sila nangayo og pasaylo. – /EIM) (BANAT NEWS)