CEBU, Philippines – Hadlok nga buwagan sa uyab maong nabuhat ni Melissa Londres ang pagdagit sa masuso gikan sa Vicente Sotto Memorial Medical Center niadtong Lunes.
Sumala pa ni Londres, 26, kinsa usa ka call center agent nahadlok siyang biyaan ni Philip Almeria, 25, tungod sa naglabing gugma niya niini.
Si Londres nga nagpatulo sa luha nga lugos masabtan ang tingog nangayo og pasaylo sa ginikanan ni Prince Niño Celadiña, nga sila Jonathan ug Jayvee.
Sumala pa niya naglaom siyang kung aduna na silay anak mapalig-on niini ang ilang relasyon. Ug nalipay siya nga dihang nasayod si Almeria nga aduna na silay anak nibalik gyud kini kaniya diha sa ilang giabangan nga lawak.
Asoy ni Londres nga niadtong bag-o pa lang sila nga uyab maayo kaayo og pagtagad niya si Almeria, apan nausab kini hangtod nagkabulag sila niadtong Abril sa miaging tuig atol mismo sa ilang usa ka tuig nga anibersaryo.
Nimabdos ang babaye ug nakuhaan siya apan padayon niyang gipatoo si Almeria nga mabdos pa gihapon siya.
Niadtong December 30, 2015 giaprobahan sa iyang kompanya ang iyang leave, niadtong higayona naghuna-huna na siya kun unsa ang iyang buhaton kay sa iyang gipatuo sa lalaki Enero siya manganak.
Busa niadtong Lunes sa buntag nagpalit siya sa usa ka department store og uniporme nga pang nurse ug miadto siya sa Cebu Puericulture Center and Maternity House Inc. (Maternity Hospital) sa pagtuong labor room kini sa Vicente Sotto Memorial Medical Center.
Apan giabog siya sa usa ka empleyado maong nigawas siya sa maong hospital ug nakita niya nga lahi diay kini ug didto misulod na gyud siya sa VSMMC.
Gani nakalusot siya sa pila ka mga gwardya nga wala gyud misita kaniya ug naabot siya sa ward diin didto ang inahan sa bata ug una niya kini nga nakahinabi tungod kay nagtoo kini nga nurse siya ug mihangyo si Jayvee nga ipahatod ni Londres ang iyang urine sample sa laboratoryo.
Asoy ni Londres nga dihang gidawat sa technician ang sample miingon ni niya nga kulangan ang ihi busa kinahanglan ning usbon ug pakuhaon siya og lain nga specimen.
Sa iyang pagbalik dugang ni Londres nga gusto na unta niya nga molakaw ug di na ipadayon ang iyang plano pagkuha og bata apan giingnan siya sa inahan nga mopaabot siya.
Didto niadtong higayona nakahuna-huna na siya og kuha sa bata sa pasumangil nga paturokan niya kini og dengue vaccine apan gisibat niya ang bata agi sa likod nga bahin. Dihang nakagawas na siya sa tambalanan gisakay niya ang bata og taxi ug gidala ngadto sa Colon aron mag-ilis siya ug didto ra pud niya gilabay ang iyang sinina nga pang-nurse.
Pasado alas-3 niadtong Lunes nauli na siya sa giabangan sa iyang kanhi boyfriend kuyog ang bata ug gipaila ni niya nga anak nila ni Philip nga gikalipay sab sa nauwahi.
Si Philip nga nagtoo gyud nga iya ‘tong anak ug nagpaka-amahan siya niini bisan sa hamubo nga panahon. Bisan ang inahan ni Londres nga si Mary Jane, 47, wa sab makatoo nga kinuha diay ‘to ang bata sa VSMMC.
Apan ang hepe sa CIDG miingon nga pasakaan og kasong kidnapping si Londres ug susihon pa ang criminal liability ni Almeria.
Gihatag na ni Dr. Gerardo Aquino ang P100 mil reward money sa CIDG-7 aron maoy mohatag niini sa impormante. – /EIM) (BANAT NEWS)