CEBU, Philippines – Gidunggab sa katagay ang usa ka lalaki pasado alas 3 sa hapon niadtong Domingo sa Sitio Mahayahay, Barangay Bankal, Dakbayan sa Lapu-Lapu.
Matud ni PO3 Luisito Ernie, imbestigador sa Lapu-Lapu City Police Office – Homicide Section, nga samdan sa ulo ug tuong bahin sa tiyan ang biktima nga si Ernesto Sasa, 41-anyos, lumad nga taga Lanao del Norte ug residente sa Barangay Dumlog, Siyudad sa Talisay.
Sa inisyal nga imbestigasyon, unang nagtagay og ilimnong makahubog si Sasa ug ang higala niini nga si Marvin Vidad, 32-anyos, ang suspek sa pagpanunggab.
Gikatahong nagkalalis si Sasa ug Vidad apan wala pa mahibaw-i sa kapolisan kung unsa ang tinuod nga giawayan sa duha samtang nagtagay.
Nagkanayon si Ernie nga nagsinukmagay ang duha diin unang nisumbag si Sasa kang Vidad apan nibawos ang suspek pinaagi sa pagdunggab sa biktima.
Ang mao’ng insidente posibleng gumikan sa kahubog sa duha, matud sa polis.
Si Sasa gidala sa ambulansiya sa Emergency Rescue Unit Foundation padulong sa Vicente Sotto Memorial Medical Center human nakaangkon og samad dinunggaban sa iyang ulo ug tuong bahin sa tiyan.
Si Ernie nidugang nga padayon pang gipangita sa kapolisan ang suspek human niikyas sa nahimong krimen ug kung madakpan, mag-atubang kini og kasong frustrated homicide. – /GMR) (BANAT NEWS)