CEBU, Philippines – Kritikal ang kahimtang sa usa ka 29 anyos nga lalaki human kini gikatahong nagpusil sa iyang ulo diha sa Barangay Ermita Proper pasado alas 12 sa nakalabay nga kaadlawon.
Giila ang maong lalaki nga si Richard Ram Palermo, 29, duna’y ka live-in ug nagpuyo sa maong dapit.
Apan ang imbestigador sa Homicide Section sa Cebu City Police Office nagduda ug wala mopadaplin sa posibilidad nga adunay foul play sa maong hitabo.
Kini human matud pa miikyas ang giingong uyab niini nga si Jovelyn Nayre, 20, lumad nga taga Bohol, nga iyang kauban sa lawak atol sa pagkahitabo base sa pamahayag sa anak sa tag-iya sa giabangang lawak ni Nayre nga si Reymar Abellar.
Nagduda usab ang mga polis kay duha ka buto ang nadungog ug sa agtang ang igo sa biktima.
Matud pa ni Police Officer 3 Winston Ybañez nga nahinabi sa Banat News nag-away ang duha sulod sa lawak sa babaye. Nasayran sa kapulisan nga adunay laing kapuyo si Palermo apan uyab niini si Nayre ug magbisitahan kini kanunay sa babaye.
Sigun pa ni Abellar nag-away ang duha dihang wala mohatag og kwarta si Nayre kang Palermo ug nibahad kining maghikog gamit ang gidalang pistola apan gibadlong kini ni Palermo.
Human napakalma ni Abellar si Palermo milakaw ang naulahi apan nakadungog na lang siya og duha ka buto sa armas gikan sa lawak ug sa iyang pagbalik, nahagba na si Palermo ug nagkadugo samtang nagpunay og hilak si Nayre sa tupad niini.
Gidala gilayon sa Cebu City Medical Center si Palermo apan gibalhin sa Vicente Sotto Memorial Medical Center. – /EIM) (BANAT NEWS)