Sundalo mireklamo og diskriminasyon nag-viral

CEBU, Philippines – Usa ka reklamo sa usa ka sundalo ang nag-viral sa social media kalabot sa giingong deskriminasyon nga iyang natagamtaman sa usa ka “Korean” lounge sa Kalibo International Airport.

Sa report sa Philstar.Com, ang maong sundalo nga nagpaila sa iyang kaugalingon pinaagi sa iyang Facebook nga si Ryan Layug, mi-post sa internet sa iyang kasinatian dihang miabot siya gikan sa Mindanao diin siya nadestino aron mag Bag-ong Tuig uban sa iyang pamilya diha sa Antique diin siya magagikan.

Matud pa niya, alas-10 pa siya sa gabii  niadtong Enero 1, 2016 niabot sa KIA ug kay alas-5 pa man sa kaadlawon ang iyang flight padung sa Cebu, miadto siya sa Korean Restaurant and VIP Lounge nga adunay bayad nga P300 apan gibalibaran siya sa babayeng staff niini nga usa ka Filipina.

Dihang iyang gipangutana kun ngano, giingnan siya sa babaye nga mga Koreano lamang ang dawaton sa maong VIP lounge hinungdan sa iyang kasagmuyo. Gibati siya og kasuko tungod kay gidid-an siya pagsud sa usa ka establisamento nga iya sa usa ka langyaw apan dinhi mismo sa yuta sa mga Filipino. Tungod sa kasagmuyo, migawas siya ug nikaon sa usa ka karenderya ug didto adunay nakatambag nga isumbong sa polis ang nahitabo kaniya, tuod man kauban ang mga polis nibalik sila sa maong kan-anan ug gikahinabi ang manager sa maong kan-anan. Didto ang Koreano nga manager nangayo og pasaylo ug miingon nga nasayop lang ang iyang staff ug miklaro nga way gipili ang iyang establisamento bisan unsa pa nga nasyonalidad. Matud pa gihaylo siya sa manager nga anha lang mopalabay sa kagabhion sa iyang establisamento nga libre apan gibalibaran na kini sa sundalo.

Wala hinuon niya kapugngi ang kaugalingon ug gisultihan ang manager nga atol sa Korean War ang mga Pilipinong sundalo mitabang sa South Korea (gubat batok sa North Korea ug China) unya karon i-discriminate siya, iyang gipangutana ang Koreano kun unsay bation niini kun buhatan siya sa ingon didto sa ilang nasud.

Sa dihang mibiya na ang sundalo ug gipadayon ang iyang pagkaon sa karenderya miapas ang manager ug giuli ang iyang insurance ID ug miingon nga sundalo siya kaniadto didto sa ilang nasud ug subli siyang nangayo og pasaylo ug miingon nga dako kaayo iyang pasalamat sa mga Pilipino.

Ang sundalo miingon nga tinuod daghang kabus nga mga Pilipino apan dili hakog, mao gani nga daghang mga Koreano nga makaanhi dinhi apan wala niya damhang abusohan nila ang mga Pilipino.

“...I cannot be bribe, sorry, but I value my being a Filipino specially in my homeland. I am Ryan Layug, a soldier, a Filipino, I am returning to duty in Mindanao after my New Year's Leave,” tipik sa iyang post.

Samtang nangayo usab siya og pasaylo ug iyang gikorihian ang una niyang  gi-post nga diin iyang nabutang nga ang maong Korean VIP Lounge iya sa Discovery Boracay Hotel and Spa kay anaa kini nahimutang sa ilang building diha sa KIA.

Ang Discover Boracay Hotel and Spa miklaro nga nag-abang lang kanila ang maong kan-anan ug wala silay kontrol niini, samtang wala usab silay gipili nga nasyonalidad sa mga gustong mo-avail sa ilang serbisyo.

Mipadayag hinuon og kaluoy si Luyag sa babayeng staff nga kinahanglang mobalibad sa iyang mga kababayan aron dili mataktak sa iyang trabaho. Gipanawagan usab niya ang mga ahensya sa gobiyerno paghimo og imbestigasyon kalabot niini nga diskriminasyon ug nanawagan sa tanang mga Pilipino nga mobarog gyud sa ilang katungod batok sa diskriminasyon dinhi mismo sa kaugalingong nasud.  Ang iyang post gi-share na dul-an 50 mil ka tawo sa FB. Philstar.com (BANAT NEWS)