CEBU, Philippines – Nadakpan sa kapolisan ang gikatahapang nangarnap og motorsiklo sa Casili, Consolacion ala 7 pasado sa buntag sa niagi’ng adlaw.
Si Police Officer 1 Socrates Borinaga sa Consolacion Police Station niila sa nadakpan nga si Gerald Mata Pongaotan, taga Sitio Cambiohan sa mao’ng lugar. Matud ni Borinaga nga gipanag-iya ni Raymond Perez Villamor ang motorsiklo nga gigamit sa iya’ng trabahante nga si Resentin Magallanes, hingkod ang panuigon nga nagpuyo sa mao’ng dapit.
Dugang ni Borinaga nga gi-parking ni Magallanes ang motorsiklo sa atubangan sa ila’ng gitrabahoan nga establesemento ug gisakiyo kini sa suspek.
Pipila ka residente sa dapit ang nakakita sa pagsakiyo sa suspek hinungdan nga ang kapolisan nihimo dayon og follow-up operation.
Naabtan ang suspek nga nisulay na unta sa pagtago sa sakyanan sa hilit nga lugar apan dali kini’ng gisikop sa kapolisan.
Si Borinaga niingon nga naghimo na sila karon og dugang pakisusi sa dinakpan tungod kay daku ang ila’ng pagtuo nga sakop kini sa grupo nga mangarnap og motorsiklo nga naglihok sa mga sikbit nga kalungsuran sa probinsiya kinsa mohimo sa pagbungkag ug ang mga pisa ibaligya isip surplus. – /GMR) (BANAT NEWS)