CEBU, Philippines – Duha ka mga polis ang naangol human aksidente nga mibuto ang 12-gauge shotgun sa kauban nilang polis sulod sa ilang buhatan sa Dumanjug samtang gilimpyohan ang maong armas.
Ang mga naangol mao sila si PO2 Edmundo Sala ug PO1 Loreniel Labasa sakop sa Dumanjug Police nga parehas nga napiskan sa tipaka sa semento human didto mipilit ang mga bolitas sa shotgun.
Samtang ang pulis nga aksidenteng nakaigo kanila mao si PO1 Marvin Libradilla.
Sumala pa ni Police Officer 2 Ronilo Quirante sa Dumanjug Police nga nahinabi sa Banat News pulos nga nag-duty ang tulo atol sa pagkahitabo.
Samtang nagtan-aw og telebisyon ang duha ka mga pulis si PO1 Libradilla ang nagkalingaw usab og limpyo sa iyang shotgun.
Apan kalit lang mipaka ang lanog nga buto ug napiskan sa tipaka sa semento ang tiil sa duha ka pulis hinungdan nga kini nangasamad.
Dali silang gidala sa tambalanan dinhi sa siyudad sa Sugbo ug luwas na ang kahimtang. Si Quirante miingon nga wala na’y plano nga moreklamo pa ang duha batok ni Libradilla kay ang maong hitabo wala man usab gituyo.
Nagpasalamat na lang usab ang duha ka pulis nga igo lang sila napiskan sa tipaka sa semento ug di bolitas.
Apan gipasabot ni Quirante nga adunay imbestigasyon nga himuon ang Cebu Provincial Police Office (CPPO) kang Libradilla gumikan sa maong hitabo sanglit ang tanang armas sa mga polis gitaptapan man niadtong mga panahona aron di mapabuto atol sa pagsugat sa Pasko ug Bag-ong Tuig gawas lang kung kini mitubag og alarma ug pangdepensa sa pulis. – /EIM) (BANAT NEWS)