Kaliwat ni Pacquiao gipusil sa hubog
CEBU, Philippines – Gipusil sa hubog nga lalaki ang usa ka tawo nga nipalit og sigarilyo sa Barangay Candulawan, Dakbayan sa Talisay niadtong nilabay’ng gabii.
Ang biktima nailhan nga si Arnel Pacquiao Alison, 50-anyos nga nagpuyo sa nahisgutang lugar samtang ang suspek nailhan lang nga si Frank.
Matud ni PO3 Ferdinand Pablo sa Talisay City Police Station nga nag-inom nang daan ang suspek uban sa iyang higala nga si Nene.
Ang biktima nigawas sa ilang panimaye aron mopalit og sigarilyo sa tindahan apan pagbalik sa biktima sa ilang panimaye, nisunod ang suspek kaniya ug siya gitawag.
Wala’y daghang estorya nibunot sa iyang armas ang suspek dayon pusil makadaghang higayon sa biktima kinsa naigo sa iyang wala nga bitiis apan siya nakamaneho pa og dagan hangtud nakatago sulod sa apartment sa ilang silingan.
Matud ni Pablo nga nisibat ang suspek human nga wala na niya magukod ang biktima.
Siya nagkanayon nga posibleng adunay daang bangi ang duha hinungdan sa pagpamusil apan wala nila gisirhan ang tanang posibilidad sa motibo sa krimen.
Nagpadayun ang follow-up operation sa kapolisan sa pagsunod sa suspek. (BANAT NEWS)
- Latest
