Nanguha’g lato nalumos
CEBU, Philippines - Patay na nga nadangat sa tambalanan ang usa ka 11 anyos nga batang babaye human kini nahulog sa kantiladong bahin sa dagat ug nalumos samtang nanguha og lato nga sud-anon ug para ibaligya diha sa Barangay Sangat lungsod sa San Fernando niadtong nakalabay nga buntag.
Ang nalumos mao si Tricia Gerado, taga Barangay Greenhills sa maong lungsod kinsa gideklarar nga patay pag-abot sa Cebu Provincial Hospital sa Dakbayan sa Carcar.
Matud pa ni Police Officer 1 Samuel Siasol, desk officer sa San Fernando Police nga nahinabi sa Banat News kuyog sa biktimang nanguha og lato ang iyang lola nga si Erlinda Gedaro, 69, ug mga ig-agaw nga edad 9 ug 11 anyos.
Apan nadakin-as kini dayon nahagbong sa kantilado nga bahin sa tubig ug gituohan nga nabunal kini sa bato una pa natagak sa kantil, gituohan usab nga di makamaong molangoy ang dalagita. (BANAT NEWS)
- Latest
