CEBU, Philippines – Gitug-an sa hepe sa kabomberuhan sa Siyudad sa Talisay nga sila andam sa low pressure o bisan pa og mahimo’ng bagyo ang nasinati karon nga dautang panahon. Matud ni Senior Insp. Randy Mendaros, hepe sa kabomberuhan sa siyudad, nga ang ila’ng composite team sa City Disaster Risk Reduction and Management Council ang gipatawag aron hisgutan ang angay nila’ng buhaton atol sa mga kalamidad. Asoy pa niya nga kun moabot ang bati nga panahon naandan sa ila’ng grupo mao ang pagpahibawo sa katawhan aron sila andam sa umaabot nga panghitabo.
“Kun aduna gani moabot nga bati nga panahon, kinahanglan ang mga tawo dili na magduka kun dili molagsik sila ug hinumduman ang mga butang nga ila’ng pagabuhaton aron malikay nga mahimo’ng biktima sa katalagman,” matud ni Mendaros. Siya nagkanayon nga sila sa kabomberuhan ang nitudlo sa kabarangayan kun unsaon pagtubag sa nagkalain-laing panghitabo.
Siya naglaum nga ang ila’ng gipangtudloan ang nipaambit sab sa ila’ng nakat-onan ngadto sa ila’ng mga konstituwente. – /GMR) (BANAT NEWS)