Adunay mga dalan nga sirad-an atol sa IEC 2016
CEBU, Philippines – Giandam na sa Cebu City Traffic Office ang gisugyot nga traffic scheme alang sa umaabot nga International Eucharistic Congress nga himuon dinhi sa siyudad sa sunod buwan.
Si Cebu Auxiliary Bishop Dennis Villarojo, secretary-general sa 51st International Eucharistic Congress, mikompirmar kagahapon sa traffic plan ug giuyonan kini sa CCTO. “We already finalized the traffic arrangements… (It was) agreed by CCTO. They already gave the go signal. It would be better if the public would be aware of the traffic plan,” matud pang Villarojo human sa ilang closed-door collaborative meeting kagahapon.
Adunay nagpadayong sinemanang panagtigom nga gihimo ang simbahan ug ang mga lokal nga mga opisyal sa kagamhanan uban sa religious leaders, IEC organizers, ug uban pang stakeholders nga adunay dakong papel sa IEC 2016.
Lakip sa ila nang natuki mao ang mga seguridad, problema unya sa basura, trapiko ug uban pa.
Matud pang Villarojo aron di kaayo magkaproblema sa traffic diha sa venue adunay mga dalan nga dili paagian sa mga motorista. Ang tibuok lane sa Pope John Paul II Avenue (kanhi Juan Luna Avenue) pasirad-an gikan sa Enero 25 (Lunes) hangtod sa 30 (Sabado) upat ka oras sa buntag (5 a.m. – 9 a.m.) ug laing upat ka oras sa hapon (2 p.m. – 6 p.m.) Matud ni Villarojo nga dili tibuok adlaw sirad-an ang maong dalan, mao kini ang agianan nga direkta padung sa IEC 2016 Eucharistic Village diin nahimutang ang IEC Pavilion, tungod kay posibleng magdasok ang mga sakyanan sa mga kadalanan palibot niini.
Sa Enero 29, sirad-an ang dalan nga anaa atubangan sa Cebu Provincial Capitol hangtud sa eskina sa Osmeña Boulevard ug Don Jose Avila Street gikan sa ala 1 a.m. hangtod sa alas 8 p.m. tungod sa ipamutang nga mga lingkuranan alang sa usa ka Santos nga Misa nga ipahigayon sa alas 4 p.m. Sa sunod adlaw, sirad-an usab ang usa ka bahin sa Osmeña Boulevard nga anaa sa kiliran sa Cebu City Sports Complex, gikan sa eskina P. del Rosario Street hangtod sa R. Landon Street, tungod kay adunay Santos nga Misa ipahigayon alang sa mga first communicants. – /EIM) (BANAT NEWS)
- Latest
