Batang Cebu World Class campaign gilusad

CEBU, Philippines – Hingpit na’ng gipasiugdahan ang awareness drive alang sa Batang Cebu World Class advocacy campaign diin ang katuyuan mao ang pag-agni ug pagdasig sa matag usa nga ipakita ang hiyas sa mga Sugbuanon sa tibuok kalibutan.

Ang kandidato sa pagka-gobernador nga si Roliveth “Klasmit Boyet” Cortes kinsa nangulo sa kalihukan namahayag nga mas palapdan pa ang information campaign pinaagi sa mass media ug social media paingon sa kalungsuran ug kabarangayan.

“Since the launching of Batang Cebu World Class, the response is overwhelming. Napukaw ug nadasig pagbalik ang mga Sugbuanon. Kita man gud mga talented, kugihan, makamao, maabilidad, result-oriented, mga buotan, hospitable ug friendly kaayo. Ang hiyas sa mga Sugbuanon tinud-anay gyud nga pa’ng world class. Each one of us can make a big difference in making Cebu and its people truly world class,” matud ni Cortes kinsa usa ka agribusiness and entrepreneurship advocate.

Ang Garbo sa Sugbo nga international recording artist Max Surban mao’y featured talent atol sa launching episode sa Batang Cebu World Class ubos sa programa’ng, “I Love You Mekaniko! sa TV5 Cebu Channel 21 niadto’ng Doming o, alas 9:00 hangtud alas 9:30 sa buntag human sa top rated agribusiness TV show, “Let’s Do Business” nga gidumala gihapon ni Klasmit Boyet. (BANAT NEWS)