Archival nagpatawag og laing special session

CEBU, Philippines – Nagpatawag na sab si acting Vice Mayor Nestor Archival og special session karong adlawa human wala nitunga ang majority bloc kagahapon aron pagtuki sa natanggong nga P2.8 bilyones nga Supplemental Budget 1 ug ang pagdeklarar nga state of calamity sa Barangay Lahug tungod sa sunog.

Lima lang ka konsehal ubos sa Team Rama ang nipakita sa session kagahapon hinungdan nga gi-adjourn ni Archival ang special session ug nipatawag og laing session karong alas dos sa hapon.

Ang mga konsehal nga nitunga mao sila si David Tumulak, Noel Eleuterio Wenceslao, Nendell Hanz Abella, Richard Osmeña ug si Phillip Zafra. Human sa pag-adjourn ni Archival, niabot si Konsehal Gerardo Carillo kinsa sakop sab sa Team Rama.

Dismayado ang mao’ng mga opisyal nga nitungha sa session tungod ang mga konsehal ubos sa Bando Osmeña Pundok Kauswagan wala nipakita kagahapon.

Matud ni Archival nga kinahanglan og siyam ka konsehal aron makapahigayon og sesyon.

Matud ni Carillo nga mao kini ang test sa pagka-bise mayor ni Archival kun molihok kini sa pagpatawag og quorum. Si Archival modagan pagka-bise mayor ubos sa BOPK atbang ni acting Mayor Edgardo Labella.

Matud ni Archival nga kun dili na usab makatunga ang ubang miyembro sa special session karong adlawa, mo-adjourn ra gihapon ang session.

Base sa records sa secretariat sa konseho sa dakbayan, si Konsehal James Anthony Cuenco lang ang niduso og personal leave gikan niadto’ng Disyembre 11 hangtud 28.

Ang ubang konsehal nga wala nitungha mao sila si Margarita Osmeña, Sisinio Andales, Alvin Dizon, Alvin Arcilla, Mary Ann delos Santos, Ma. Nida Cabrera, Eugenio Gabuya, Roberto Cabarrubias, ug Lea Japson.

Gusto sa mga Team Rama nga konsehal nga ma-aksiyunan karong adlawa ang SB-1 tungod kay matapos na ang tuig.

Lakip sa nabutang sa SB-1 ang P2.4 bilyones alang sa pagbayad sa outstanding balance nga utang sa siyudad sa South Road Properties.

Apan lig-on ang baruganan sa majority bloc nga dili aprobahan ang SB-1 tungod kay aduna pa’y pending nga kaso nga gipasaka ni Romulo Torres batok sa konseho nga nagkwestiyon sa validity sa pagbaligya sa luna sa SRP nga gigamit nga source of fund sa SB-1. – /GMR) (BANAT NEWS)