CEBU, Philippines - Gibilanggo karon sa Presinto 1 sa Mandaue City Police Office (MCPO) ang upat ka dispatser nga nadakpan sa akto sa kapolisan nga nanawag og pasahero bugti sa sinsiyo nga pangayoon nila gikan sa mga PUJ drayber.
Si PO2 Jayson Flores miila sa mga dinakpan nga sila si Ronnie Zafra, 25, Bryan Mandaue, 30, nga taga Mantuyong, Mandaue; Ramir Ceniza, 42, ug Eldie Sanchez, 39, taga dalan T. Padilla, dakbayan sa Sugbo.
Matud ni PO2 Flores nga gireklamo sa pipila ka drayber og PUJ ang upat ka dispatser kay napul-an sa pagsige’g pangilkil kanila og mga sensiyo ug masuko kun dili hatagan.
Dugang ni PO2 Flores nga ang team ni PO2 Manolito Dadola maoy mipahigayon og operasyon nga miresulta sa pagkasikop sa upat ka dispatser nga naaktohan nila nga nagsige’g panawag og pasahero aron mosakay sa PUJ.
Si PO2 Flores miingon nga ang upat hayan pasakaan karong adlawa og kaso nga paglapas sa anti-dispatching ordinance.
Dinhi sa dakbayan sa Sugbo, mikatap usab ang mga dispatser sa lainlaing mga eskena nga sagad anha mohunong ang mga PUJ aron mopasakay og pasahero.
Ang kapolisan ingon man ang mga traffic enforcers magpanagana nga mobadlong sa mga dispatser bisan pa man sa pagbagulbol sa mga PUJ drivers.
May pagduda gani nga pipila sa mga polis nagpaluyo sa kalihukan sa mga dispatser bugti sa bahin nga ihatag kanila. (BANAT NEWS)