Ang LTFRB andam na sa ilang gimbuhaton sa Pasko
CEBU, Philippines – Tulo nalang ka adlaw, Pasko na gyud.
Subay niini, ang Land Transportation Franchising and Regulatory Board (LTFRB)-7 naghimo na usab og preparasyon aron hapsay ug malinawon ang pag-uli sa mga Sugbuanon sa tagsa-tagsa nila ka mga dapit sa probinsya aron adto magsaulog sa Pasko.
Matud ni acting LTFRB-7 regional director Reynaldo Elnar nga ang ilang mga inspectors nagsugod na pagsusi sa north ug south bus terminal lakip na usab sa terminal sa mga passenger jeepney.
Dugang ni Elnar nga ugmang adlawa ang ahensiya subli nga molibot sa nagkadaiyang mga terminal aron mosusi sa mga unit ug sa papeles sa mga bus. Mobutang usab ang LTFRB og help desk.
Tumong sa pagbutang og help desk sa mga terminal, dili lang aron adunay maduolan ang mga pasahero nga may mga pangutana, apan lakip na usab niadtong mga operators nga gustong mokuha og special permit alang na sa pagbiyahe nga gawas sa ilang mga rota kun adunay daghang pasahero.
Nasayran ang LTFRB-7 nakadawat na og request alang sa pagkuha og special permit gikan sa Vallacar Transit nga adunay kapin sa 40 ka units sa Ceres Bus aron sila makabiyahe sa mga rota kun adunay daghang nagkinahanglan og kasakyan.
Kini tungod kay gilauman man nga mag-ambahan ang mga pasahero nga mopaingon sa lainlaing destinasyon sa probinsya.
Apil sa tan-awon sa LTFRB mao ang mga sakyanan nga mibiyahe bisan og wala sila’y prangkisa nga nagtugot kanila sa pagpamasahero.
Miingon si Elnar nga tungod sa kadako sa multa base sa gipatuman nga Joint Administrative Order (JAO), wala nay mi-operate og mga kolorum nga mga sakyanan. – /RUB) (BANAT NEWS)
- Latest
