Mandaue motabang sa Samar
CEBU, Philippines – Gisanong sa mga opisyal sa kagamhanan sa Dakbayan sa Mandaue ug mga kawani ang awhag nga mohatag og donasyon sa mga biktima sa bagyo’ng Nona sa Lalawigan sa Samar.
Natigayon ang mao’ng pagdonar pinaagi sa giluwatan nga memorandum ni Mayor Jonas Cortes ngadto sa mga opisyal ug mga kawani sa kagamhanan sa dakbayan.
Giawhag ni Cortes ang tanan sa pagsalmot sa pagpanghatag og pinaskuhan sa mga biktima sa katalagman.
Mahimo’ng madonar ang binotelya’ng tubig, mga de lata nga pagkaon, noodles ug uban pa ingon man mga relief goods nga naglakip sa used clothing ug uban pa.
Ang command center nga nahimutang sa City Hall sa maong dakbayan ang gitahasan sa pagdawat sa mga donasyon.
Gawas sa mga kawani ug mga opisyal sa kagamhanan sa dakbayan, gipaabot sa command center ang mga pribado’ng sektor lakip sa mga magpapatigayon sa paghatag usab og donasyon sa biktima sa bagyo. – /GMR) (BANAT NEWS)
- Latest
