CEBU, Philippines – Gibanabana nga P50 mil ang danyos sa sunog sa Sitio Tinabangay 2, Alaska, Mambaling, Dakbayan sa Sugbo kagahapon sa hapon.
Matud ni Fire Investigator Roylin Maratas nga nadawat nila ang alarma alas 3 ug nakontrolar sulod sa singko minutos nga fire fighting operation ug giisa nila sa second alarm.
Sumala pa ni Maratas nga nagsugod ang sunog sa panimalay ni Lydia Romares nga giabangan sa usa ka computer shop nga iya ni James Navarro.
Dugang ni Maratas nga upat ka panimalay ang hingpit nga naugdaw samtang tulo ang nakan-an sa mao’ng sunog diin ang kalisud sa dalan ug kadaghan sa mga tawo nga usisero mao’y nasugatan nila nga problema.
Gibutyag ni Maratas nga ila pa ipatawag ang mga bata nga nakasaksi sa pagsiga sa linya sa kuryente gikan sa internet cafe.
Si Romares sa iya’ng bahin nibutyag nga imposible kaayo’ng nagsugod sa ila tungod kay wala man sila’y kuryente ug dili usab siya magluto kay mamalit ra sila sige sa gawas.
Gitug-an ni Romares nga wala gyud siya nasayud kung asa nagsugod ang sunog kay wala man usab siya atol sa insidente ug didto siya sa tambalanan.
Ang negosyante ug kahoy nga si Lorna Baya nibutyag nga pipila na lang sa mga kahoy nga bag-o niya’ng kinompra ang nahabilin.
Gibutyag ni Baya nga dul-an sa P200 mil ang kompra niya sa mga kahoy nga iya’ng negosyo samtang nagpanghupaw nga nahinabi sa Banat News. Samtang si Atty. Collin Rosell, pangulo sa Department of the Welfare of the Urban Poor sa Dakbayan sa Sugbo, sa iya’ng bahin nibutyag nga ila pa susihon kung kinsa’y nanag-iya sa mga yuta nga gipuy-an sa mga nasunugan.
Ang mga sakop sa Department of Social Welfare and Services nisusi pa karon kung pila ka pamilya ang apektado sa sunog.
Ang sunog mao’y ikaduha’ng sunog sa Alaska, Mambaling karong tuiga diin ang una nahitabo niadtong nilabay nga buwan sa Sitio Puntod ug Abbya. – /GMR) (BANAT NEWS)