Sugbo makaangkon og P377M nga FMR

CEBU, Philippines – Sa pagtapos niini’ng tuiga, ang kagamhanan sa probinsiya nakaangkon og P377 milyones nga farm-to-market road projects.

Ang Regional Project Advisory Board (RPAB) sa Central Visayas niaprobar sa tulo ka FMR sub-projects sa Sugbo niadto’ng Disyembre 8.

Ang approval sa RPAB mao’y una’ng lakang aron ang proyekto makakuha og pundo sa Department of Agriculture’s World Bank-funded Philippines Rural Development Program (PRDP).

Si Provincial Agriculturist Roldan Saragena nagkanayon nga ang proyekto mao’y labi’ng daku nga giaprobahan sa RPAB nga may gitas-on nga 19-kilometros nga nahimutang kini sa Lungsod sa Sogod.

Ang laing bag-ong proyekto nga giaprobahan sa RPAB nahimutang sa Lungsod sa Tudela ug Santander diin adunay gitas-on nga 11 ug unom ka kilometros.

Sayo niini’ng tuiga, ang RPAB ni-endosar sa P143 milyones nga FMR projects sa mga lugar sa amihanan sa Sugbo nga grabe’ng naapektohan sa bagyo’ng Yolanda.

Ang bidding sa mga proyekto nasugdan niadto’ng Nobiyembre human nga ang National Project Coordination Office niisyu og No Objection Letter 1.

Sa laing bahin, duha ka small livelihood projects sa Lungsod sa San Remigio ang giaprobahan usab sa RPAB. Ang mao’ng livelihood projects gilangkuban sa native chicken production sa Barangay Maño ug wine production sa Barangay Tambongon.

Subay niini, ang dagku’ng livelihood sub-projects ang iendorso sunod tuig matud ni Estella Rodriguez, project management officer sa PRDP-Cebu Provincial Project Monitoring and Implementing Unit (PPMIU).

Ang PRDP usa ka countrywide mechanism nga maghatag og pundo sa pag-develop sa accessibility sa kaumahan ug ubang component projects.

Ang Cebu-PPMIU niila sa siyam ka road links nga ilakip sa funding sa 2016 annual investment plan.

Samtang ang probinsiya mohatag og 10 porsiyento o P97 milyones nga counterpart sa proyekto. – /GMR) (BANAT NEWS)