CEBU, Philippines – Tukion karong hapon sa sesyon sa Provincial Board ang paghuwam og P200 milyones sa Kapitolyo sa Land Bank of the Philippines aron ipalit sa mga heavy equipment.
Si Bokal Miguel Antonio Magpale, chairman of the committee on planning and development, gikatakda nga mopresentar sa iya’ng report bahin sa ordinansahon nga gipangamahanan ni Bokal Peter John Calderon aron pagtugot nga makapangutang ang Kapitolyo.
Bisan anaa sa agenda sa sesyon karong hapon apan si Magpale nagdumili pagbutyag sa rekomendasyon sa komitiba nga iya’ng gipangulohan.
Lakip sa P235.4 milyones nga supplemental budget nga gipasar sa PB niadto’ng Huwebes ang P198 milyones isip kabahin sa P250 milyones nga pundo alang sa pagpalit sa heavy equipment.
Si Provincial Budget Officer Danilo Rodas nipasabot nga ang P198 milyones rekisito kini aron ipagawas sa LBP ang utangon.
Nakontrobersiyal karon ang pagpalit sa mao’ng heavy equipment nunot sa giingong pagpaburot sa presyo sa supplier nga gipadaug sa Bids and Awards Committee (BAC).
Ang mga dokumento anaa pa sa PB Ad-Hoc Committee nga gipangulohan ni Bokal Grecilda Sanchez-Zaballero aron ma-review sa dili pa ihatag ang pagtugot sa pag-award ngadto sa ConEquip Philippines, Inc. sa kontrata.
Apan si Gobernador Hilario Davide III nipirma na sa Notice of Award sa ConEquip nga mao’y mo-supply sa mga heavy equipment nga balor og P250 milyones. (BANAT NEWS)