Tungod sa kabaw, silingan gipatay

CEBU, Philippines – Gitigbas ang liog ug gipusil sa  iyang silingan ang usa ka mag-uuma sa ilang panaglalis   kabahin sa kabaw nga magpunay lang og sibsib sa tanom nga mais sa iyang silingan pasado alas 5 sa miaging buntag sa Barangay Taboc-Camaligbato sa Dakbayan sa Danao.

Patay na dihang naabtan sa kapolisan si Santos Castro, 46, human nga gitigbas ug gipusil sa iyang silingan nga si Francisco Landero, 51, kinsa mitahan ra usab sa iyang kaugalingon human sa hitabo.

Sa pagresponde sa grupo ni Police Officer 3 Nelson Pantoja sa Danao Police Station  naabtan nila ang patay nga lawas sa biktima nga may samad tinigbasan sa liog ug sa ilang paghiling aduna pa silay nakit-an nga samad pinusilan sa dughan.

Tungod kay may nakasulti nga mga saksi nga ang mipatay kaniya mao ang iyang silingan nga si Landero gipangita dayon kini sa kapolisan.

Apan si Landero misibat gikan sa crime scene ug misirit pud diay padulong sa estasyon sa kapolisan aron motahan sa iyang kaugalingon ug gitunol ngadto sa kapolisan ang iyang nagkadugo pa nga sundang ug ang iyang pusil.

Nasuta sa mga imbestigador nga ang biktima ug ang suspek naglalis sa sayong buntag niadtong Biyernes tungod sa kabaw sa suspek.

Matud pa sa imbestigasyon nga mireklamo ang biktima kay ang iyang tanom nga mais sibsibon sa kabaw sa suspek ug dihang nagkita sila sa suspek iya ning gikomprontase apan misangpot hinuon sa panaglalis ug miresulta sa pagpanigbas ug pagpusil patay sa biktima.  (BANAT NEWS)