CEBU, Philippines – Usa ka 47-anyos nga lalaki nga kalit mitabok sa dalan ang patay human nabanggaan og usa ka motorsiklo diha sa Manuel L. Quezon Highway sa Barangay Pusok, Dakbayan sa Lapu-Lapu niadtong Huwebes, alas 7:30 sa gabii.
Matud pa sa traffic investigator nga si Police Officer 3 Jobin Pino sa Lapu-Lapu City Police Office- Traffic Management Unit nga ang biktima mao si Allen Tojeno, residente sa Sitio Mustang, Barangay Pusok nagtindog sa center island sa habig sa Maximo Patalinghug Avenue sa Barangay Pajo apan kalit mitabok sa dalan.
Niadtong tungora nilabay ang motorsiklong gimaneho ni Mark Jerald Barbon, 28, taga Barangay Day-as, Lungsod sa Cordova.
Matud pa nga nagsige og busina si Barbon samtang padung kini paggawas gikan sa Mactan Economic Zone 1 ug padulong liko sa dalan sa Pajo sa dihang mitabok si Tojeno ug napunggit kini.
Tungod sa kakusog sa pagbangga, nangalagpot ang duha ug daling gidala sa tambalanan.
Nakaangkon og mga pangos ug samad sa lawas si Barbon samtang si Tojeno namatay sa Mactan Doctor’s Hospital. Matud ni Pino, posibleng makasohan si Barbon sa pamilya ni Tojeno. (BANAT NEWS)