Tungod sa intriga diha sa Facebook ginang gisamad-samaran og blade

CEBU, Philippines - Nakaangkon og tabas-tabas ang likod ug ubang bahin sa lawas ang usa ka 26 anyos nga inahan human gibugno sa laing inahan atol sa children’s Christmas party sulod sa usa ka food chain sa usa ka mall diha sa dalan Colon ning Dakbayan sa Sugbo pasado ala- 3 sa nakalabay nga hapon.

Ang biktima giila nga si Ma. Andrea Shella Gahi, nga taga Jakosalem Street, Barangay Parian, samtang ang gitudlo nga suspetsado mao si Maricel Swerte, 23, nga taga Barangay Apas.

Matud pa ni Police Chief Inspector Jose Gesto, hepe sa Waterfront Police nga nahinabi sa Banat News, aduna nay daang kasungian ang duha tungod sa intriga-intriga sa Facebook.

Ang mga anak sa duha ka inahan miapil sa programa sa barangay Parian alang sa mga bata.

Apan sa dihang nagkita og balik ang duha sa kalingawan sa mga bata sa maong dapit adunay panaglalis nga nahitabo sa duha ug misangpot sa panagbugno hangtud nga nakakuha og gituohang razor blade ang suspek ug gigamit kini pagtabas-tabas sa biktima.

Apan wala’y nakuha nga hinagiban ang kapulisan atol sa pagkasikop sa suspek.

Gipasakaan na og kasong frustrated homicide ang suspetsado nga gipaslak na sa selda sa Waterfront Police Station.  (BANAT NEWS)