Uyab di pahilabton sa lawas sa naghikog
CEBU, Philippines - Patay na nga nadiskubrehan ang 26-anyos nga ulitawo nga gituohang naghikog sa gipuy-an niining panimalay sa Barangay Truimfo, Lungsod sa Carmen alas 3 pasado ang takna sa niagi’ng kaadlawon.
Si Senior Police Officer 2 Simplicio Gibo sa Carmen Police Station niila sa namatay nga si Bobet Casas Plaza, trabahante sa Mactan Export Processing Zone sa Dakbayan sa Lapu-Lapu.
Matud ni Gibo nga nag-inusara nga nagpuyo sa panimalay ang namatay ug nahingangha na lang ang iya’ng pamilya diha’ng ila’ng nadiskubrehan nga nagbitay na sulod sa ila’ng panimalay.
Ang inahan nga si Sabina Casas Plaza nitug–an sa kapolisan nga nagkatabi pa sila sa iya’ng anak kinsa niingon nga kung mamatay siya, dili gyud pahilabtan sa uyab ang iya’ng patay nga lawas.
Kini ang nakapaduda nga ang uyab ang hinungdan sa paghikog sa ulitawo.
Si Barangay Kapitan Luis Manulat ang nakapahibawo sa kapolisan sa mao’ng insidente. (BANAT NEWS)
- Latest
