CEBU, Philippines - Peke ang Certificate of Nomination and Acceptance (CONA) sa nipuli nga kandidato sa pagka-mayor sa Lungsod sa Bantayan ubos sa Partido Promdi.
Si Oscar Canton, secretary-general sa Promdi, nireklamo sa buhatan sa Commission on Elections sa Lungsod sa Bantayan batok ni Arturo Despi.
Si Canton giingong wala makapirma og CONA sa pagpuli ni Despi isip kandidato sa pagka-mayor.
Apan si Despi nga nahinabi sa Banat News mihimakak sa pasangil ug nibawos hinuon pagpasangil nga dunay bulok politika ang pasangil kaniya.
Gibutyag ni Despi nga ang CONA nga iyang gigamit sa pagpuli sa kapitan sa Barangay Binawbaw nga si Jose Caracena adunay pirma ni Canton ug gihatag kini ni Roberto “Babbit” Ybañez ngadto kaniya.
Si Ybañez sakop sa hunta probinsiyal panahon ni kanhi gobernardor Emilio “Lito” Osmeña, ang founder sa Promdi.
Si Provincial Election Supervisor, Atty. Lionel Marco Castillano, nagkanayon nga ang election officer sa Bantayan nga si Deni Demecillo nipakita kaniya sa kopya sa suwat ug affidavit ni Canton.
Matud ni Castillano nga si Canton nagkanayon nga wala siya maka-isyu og CONA kang Despi ug wala usab siya sa Bantayan dihang giingong ginotaryuhan ang CONA atubangan sa usa ka huwis.
Ang Comelec sa Bantayan nipadala sa affidavit ug suwat ni Canton lakip na ang CONA ug certificate of candidacy (COC) ni Despi ngadto sa Comelec Law Department.
Gipasabot ni Castillano nga ang Law Department mao’y mo-determinar kung ang substitution ni Despi balido ba o dili.
Naa usab sa Comelec Law Department ang specimen sa mga pirma sa mga authorized persons nga mopirma sa CONA sa mga political parties.
Ang Comelec sa probinsiya naghuwat sa resulta sa desisyon sa Law Department kabahin sa mao’ng kaso. (BANAT NEWS)