CEBU, Philippines - Patay na nga nakit-an ug naligo sa dugo ang 44-anyos nga lalaki human gidunggab sa liog sa Sitio Bulalacao, Nug-as, Lungsod sa Alcoy pasado alas 5 sa nakalabay nga buntag.
Ang biktima giila nga si Gregorio Dechosa, minyo ug mag-uuma nga nagpuyo ra sa mao’ng dapit.
Sumala pa ni Police Officer 1 Alejandrino Dayaganon Jr. sa Alcoy Police Station nga gikan ang biktima nitambong sa disco sa bisperas sa piyesta sa mao’ng dapit.
Katapusang nakita nga buhi ang biktima pasado alas 12 sa gabii diha’ng nigawas sa diskohan ug paingon mouli sa ila’ng balay.
Si Dayaganon niingon nga nabantayan sa mga tawo sa diskohan nga hubog ang biktima diha’ng nipauli. Pasado alas 5 sa buntag nakita ang patay nga lawas sa biktima nga nagbuy-od daplin sa hilit nga bahin sa karsada nga wala na’y kinabuhi ug may duha ka samad dinunggaban sa liog nga nagtapad ug gituohang gigamitan og screwdriver o ice pick.
Gipadaplin hinuon sa kapolisan ang pagtuo nga gipatay sa ungo ang biktima gumikan sa samad sa liog.
“Gagmay nga samad sa liog sir pero lawom nagtapad, dili ni kutsilyo ang gamit kay dili man laslas ang samad, dili pod mi motuo nga gi-ungo ni, lagmit ice pick o screwdriver ang gigamit ani,” matud ni Dayaganon.
“Mura siya og distansya sa ngipon kung imo’ng tan-awon kay nagtapad man ang samad, pero dili mi motuo ana’ng ungo-ungo sir,” dugang ni Dayaganon.
Usa sa gisubay sa kapolisan kung may gikaaway ba ang biktima sulod sa diskohan nga posible’ng kini gisundan ug gipatay.
Lakip sa gisundan nga anggulo sa kapolisan nga posible’ng natagboan og mga maldito ang biktima dayon natripingan ug gipatay.
Gipasabot ni Dayaganon nga usa sa ila’ng problema ang pagpangita og testigos sa krimen gumikan kay mingaw ang mao’ng dapit. (BANAT NEWS)