CEBU, Philippines - Gikatakda nga relibuhan sa pwesto ugma’ng adlawa ang hepe sa Dumanjug Police Station nga si Senior Insp. Arvi Arbuis.
Kini nunot sa giatubang nga imbestigasyon sa pasangil nga pagpangulata sa mga nadakpan nga suspek sa pagpang-ambush sa grupo ni Bise Mayor Efren Gica.
Si Arbuis gikatakda’ng hulipan ni Senior Insp. Julius Ompad, nga kasamtanga’ng hepe sa Barili Police Station ug usa usab ka abogado.
Gitug-an ni Chief Insp. Fructoso Lim, hepe sa Police Community Relations sa Cebu Provincial Police Office atol sa 86th Talakayan Sa Isyung Pulis, nga ang pagrelibo ni Arbuis mao usab ang paghatag og dalan sa imbestigasyon nga gihimo sa Provincial Investigation and Detective Management Branch.
Ang mga sakop sa Dumanjug Police nga gipangulohan ni Arbuis ang gipasanginlan nga nikulala nila ni Joselito Quirante ug Samuel Villagonzalo sulod sa buhatan sa kapolisan diha’ng sila nadakpan.
Gawas sa imbestigasyon, mismo si Mayor Nelson Garcia ang gusto usab nga mahulipan si Arbuis.
Human nakadawat sa suwat hangyo ang direktor sa CPPO, Senior Supt. Noel Gillamac, gikan ni Garcia, nihatag usab dayon og lima ka pangalan si Gillamac diin si Ompad ang napilian.
Gumikan sa panagbangi sa mga opisyal sa Lungsod sa Dumanjug, si Gillamac nihangyo sa mga politiko nga dili iapil sa isyu ang mga polis ilabi na sa hepe nga igo ra usab nipatuman sa trabaho.
Samtang gipasabot ni Lim nga ang pagkamatay nila ni Marciano Tiwan, Wilfredo Albios nga usa ka konsehal sa Barangay Masa, Dumanjug, ug pagkasikop ni Bemar James Mejares resulta sa usa ka lehitimo nga operasyon.
Kini sukwahi sa nanggawas nga estorya nga rob-out ang hitabo ug dili engkwentro.
Karong adlawa ang katapusang adlaw ni Arbuis isip hepe sa Dumanjug Police ug ugma usab ang una’ng adlaw ni Ompad.
Si Ompad ang ika-14 nga hepe sa kapolisan sa Dumanjug sugod tuig 2013. (Jojo C. Ugdol/GMR)(BANAT NEWS)