CEBU, Philippines - Tulo ka mga parokya nga layo sa Dakbayan sa Sugbo ang bisitahon ni Archbishop Jose Palma atol sa pagpahigayon sa Misa de Gallo.
Unang bisitahon sa Arsobispo karong Disyembre 16 ang Manlapay Parish (Dalaguete); Disyembre 17 sa John Paul II House for Priest; Disyembre 18-Archbishop Resident Chapel, Disyembre 21-CCTN Chapel, Disyembre 23- Medellin Parish, Disyembre 24- Sta. Rosa Parish, Olango Island.
Ang misa sa Arsobispo sa tungang gabii sa Disyembre 24 anha ipahigayon sa Cebu Metropolitan Cathedral.
Tradisyon na sa Arsobispo sa Sugbo nga mopahigayon og Misa de Gallo sa mga nagkalain-laing parokya matag tuig.
Ang Misa de Gallo usa ka tradisyon sa mga Filipino pagsaulog sa Pasko nga masubay pa panahon sa mga Espanyol, tradisyon kini nga gisunod hangtud karon sa mga Filipino.
Karong tuiga, dungan sa selebrasyon ang Jubilee Year of Mercy ug giampo nga ang magtutuo makakita sa dagway ni Hesus nga mao ang dagway sa kaluoy. “Usa ra gyud ang atong pag-ampo, dili lang nga malampuson ang kalihokan nga umaabot. Karon nga giablihan ang extra-ordinary Jubilee Year of Mercy, nga ang panagway ni Kristo makita unta nga panagway sa kaluoy,” matud pa sa tigpamaba sa Archdiocese of Cebu, Monsignor Joseph Tan.
Sukad pa sa 16-siglo, gihimo na ang Misa de Gallo sukad nga gitugot sa Romano Katoliko ang pagpahigayon og Santos nga Misa dinhi sa Pilipinas sayo sa kaadlawon. Matud pa ni Tan ang tradisyon gipasa sa mga Mehikanong misyonero kaniadto.
“Nagsugod ni siya ug na-inherit ni nato sa mga misyonero nga Espanyol labi na sa mga misyonero nga gikan sa Mexico kay practice man ni nila ang novena,” dugang pa ni Tan.
Ang kalainan sa Misas de Gallo dinhi itandi sa ubang mga nasud, usa usab kini ka Novena mass nga gipahinungod kang Birhen Maria ug lahi ang mga basahon niini itandi sa ubang mga Santos nga Misa. “Nine day novena masses ni para sa pangandam sa Pasko aron magpabilin nga Katoliko ang Pilipinas. Dili ni misa sa adviento, kay naa may text ang advent misa ni siya pasidungog sa Birhen,” dugang pa ni Tan. (Bryner Diaz ug Rowena D. Capistrano/EIM)(BANAT NEWS)