Nipalusot og fake nga kwarta nasikop

CEBU, Philippines – Nagbayad og mini nga kwarta nadakpan sa tag-iya sa tindahan sa merkado publiko sa Barangay Centro, Dakbayan sa Mandaue alas  9 pasado sa niagi’ng gabii.

Si Police Officer 2 Jayson Flores sa Presinto 1 sa Mandaue City Police Office (MCPO) niila sa nadakpan nga si Ramil Decierto Rotcha, 38, minyo nga taga Villagonzalo II, Dakbayan sa Sugbo.

Ang tag-iya sa tindahan nga si Noel Alcober, 57-anyos, nagdali sa paggukod sa suspek sa Sitio Tribunal, Centro hinungdan sa pagkasikop.

Dugang pa ni Flores nga nagpalit lang og grocery ang suspek nga nagkantidad lang og P200 ug mao’y gibayad ang tibuok nga P1,000 ug human sa pagtunol, nagdali ang suspek sa pagsakay sa gi-parking nga motorsiklo ug nipabulhot sa pagpadagan.

Wala na nanumbaling ang suspek nga gitawag sa biktima nga fake ang kwarta hinungdan nga naaghat sa pagsakay sa iya’ng motorsiklo dayon gukod. Samtang nagdagan, nagpanawag usab kini sa mga tawo nga sugaton ang suspek nga nakaaghat sa mga traffic enforcers nga nadestino sa mao’ng lugar nga mao’y hinungdan sa pagkasikop.

Diha’ng girekisa ang mga bulsa sa karsones sa suspek, mao’y nasuta sa kapolisan nga daghan pa ang fake nga kwarta nga naglakip sa lain pa nga P1,000 ug mga tag P500. – /GMR) (BANAT NEWS)