CEBU, Philippines – Gikumpiska sa buhatan sa Department of Environment and Natural Resources ang dul-an 400 ka red lauan nga giabandonar sa baybayon sa Lapu-Lapu City.
Ang nakumpiskang kahoy nadiskubrehan diha sa Sitio Malingin, Barangay Punta Engaño sa maong siyudad nagkantidad og P436,440 (7,274 board feet).
Ang membro sa Community Environment and Natural Resources-Cebu City sa pakigtambabayong sa mga buhatan sa Philippine National Police, Mandaue City; ug Philippine Navy naghiusa sa pagsakmit niini human sila nakadawat og taho niadtong Disyembre 10.
Milanat sa unom ka oras ang pag-haul sa mga kahoy gikan sa Punta Engaño ngadto sa buhatan sa CENRO sa may Pier 3. Ang mga kahoy ipaubos sa administrative seizure proceedings. Sumala ni DENR-7 Regional Director Isabelo Montejo wala pa sila’y nakuhang impormasyon kun asa gikan ug para kang kinsa ang maong kahoy, apan base sa inisyal nga report nga ilang nadawat, gikan kini sa Surigao.
Matud ni Montejo ang illegal nga pagpamutol og kahoy ilabi na endangered specie dakong kalapasan sa Section 77 of Presidential Decree 705 or the Revised Forestry Code of the Philippines as amended by Executive Order No. 277 and as renumbered by Republic Act 7161 in relation to Executive Order No. 23.
Sa dugang bahin, ang buhatan sa CENRO-Cebu City miluwat og 15 days notice sa pagkuha sa gikumpiskar nga kahoy. Ang claimants gi-imbitahan usab sa usa ka administrative proceedings.
Dugang kinse ka adlaw ang ihatag sa di pa moluwat og final confiscation order ang CENRO pabor sa lokal nga kagamhanan. – /EIM (BANAT NEWS)