P2M shabu nasakmit sa police checkpoint

CEBU, Philippines - Kapin sa duha ka milyon ka pesos nga kantidad sa shabu ang nasakmit sa mga sakop sa Mabolo Police Station gikan sa duha ka mga lalaki nga nagsakay og motorsiklo atol sa ilang gihimo nga checkpoint diha sa S. Osmeña Street, Barangay Mabolo ning dakbayan alas 11 sa nakalabay nga gabii. Ang mga dinakpan naila nga sila si Marvin Quizon, 22, drayber sa motorsiklo nga taga Abellana, Barangay Suba, Cebu City ug French Villanueva, 22, nga taga Conception, Pasil ning dakbayan.

Ang duha sakay sa Mio Yamaha nga motorsiklo ug nilabay sa check point sa kapulisan sa maong dapit.

Apan matud pa ni Senior Inspector Allan Rosario, hepe sa Mabolo Police nga nahinabi sa Banat News nga imbis mohunong misulay pa og sibat ang mga suspetsado human nakakita og polis hinungdan nga ila kini nga gibabagan hangtod nadakpan.

Sa pagrekisa sa kapulisan ilang narekober ang usa ka dakung putos sa gituohang shabu gikan sa eco-bag nga gisab-it diha sa motor nga mitimbang og 200 gramos nga gibanabanang nagkantidad og P2, 360,000.

Si Rosario nagtuo nga ang duha mga drug couriers bugti sa bayad sa nagsugo kanila. Ang mga suspek wala motug-an kun si kinsa ang nagsugo kanila ug kun asa nila kini ihatod.

Gisubay karon sa Mabolo Police ang background sa duha ug kung wala pa ba kini nadakpan kaniadto sa laing buhatan sa kapulisan sa kaparehas nga kaso. (Jojo C. Ugdol/EIM)(BANAT NEWS)