CEBU, Philippines - Usa ka 22-anyos nga lalaki ang gipusil-patay, human gikatahong mihulga sa silingan nga mipusil kaniya diha sa ilang lugar sa Sitio Kadulang, Barangay Marigondon Dakbayan sa Lapu-Lapu sa miaging hapon.
Si Senior Police Officer 3 Manolito Abellanosa, imbestigador sa Lapu-Lapu City Police Office- Homicide Section nagkanayon sa Banat News nga ang biktima mao si Arvin "Soda" Sagarino, residente sa Sitio Kalubihan sa maong barangay.
Sa inisyal nga pakisusi sa kapolisan, si Sagarino adunay pagdumot ngadto sa gikatahong suspetsado nga si Roy Sagang, 29 anyos, matud pang Abellanosa gipadad-an sa biktima og text si Sagarino nga naghulga nga iyaha kining patyon.
"Mihulga ang biktima ngadto kang Sagang sa text, nya gahapon, niadto ni siya sa balay sa suspect. Nakadungog ang mga silingan nga nagbuto-buto na sulod sa balay," dugang ni Manolito.
Dugang ni Abellanosa, nakit-an sa mga silingan nga natumba si Sagarino human sa butobuto ug ilang nakita si Sagang nga daling niikyas palayo sa dapit.
Sa dugang nga imbestigasyon sa kapolisan, si Sagarino gikatahong notado nga kawatan sa ilang lugar ug napriso na kini kaniadto diha sa Lapu-Lapu City Jail human nalambigit sa kaso sa pagpangawat.(Christell Fatima Tudtud/EIM)(BANAT NEWS)