Traysikol gidumog sa awto, 5 angol

CEBU, Philippines - Nangaangol ang lima ka tawo human gidasmagan sa pribado’ng sakyanan ang usa ka traysikol sa Barangay Magdugo, Dakbayan sa Toledo.

Ang mga naangol mao sila si Rachael Martinet, usa ka engineer, ug mga anak nga sila si Deby Fel Martinet, 10, ug Ezra Mae Martinet, 6-anyos.

Lakip sa naangol sila si Dyna Labajo, 33, ug ang drayber sa traysikol nga si Harold Labajo, 37, pulos taga Barangay Ilihan.

Sa imbestigasyon sa traffic section sa Toledo City Police Station nasayran nga  gikan sa Barangay Sangi ang mga biktima ug paingon sa Barangay Magdugo.

Pag-abot sa mao’ng lugar, ang nagsunod nga sakyanan nga Honda Civic nga gimaneho ni Keith Bryan Fernandez, 19, ulitawo nga taga Bulacao, Dakbayan sa Sugbo ang kalit nga nidasmag sa luyo nga bahin sa traysikol.

Tungod sa kakusog sa impact maayo’ng pagkalimbuwad sa traysikol hinungdan nga nakaangkon og samad ug pangos sa lawas ang mga biktima.

Dali’ng gidala sa Toledo City Hospital ang mga biktima apan si Rachael ug Ezra Mae ang gibalhin sa pribado’ng tambalanan sa Dakbayan sa Sugbo. (Raymond D. Abarcas/GMR)(BANAT NEWS)