Pangandam sa IEC apektado sa suspenso ni Rama

CEBU, Philippines - Nadismaya ang kadagkuan sa umaabot International Eucharistic Congress sa pagsuspenso kang Cebu City Mayor Michael Rama.

Matud ni Auxiliary Bishop Dennis Villarojo, secretary-general sa IEC2016 nga nakahatag kini og set-back sa pagpangandam sa kalihukan ilabi na nga si Rama usa sa nitabang sa preparasyon.

Hinuon masaligon si Villarojo nga ang mga Sugbuanon dili motugot nga mahugno ang siyudad gumikan lang sa hitabo dungan sa pag-ingon nga mahimo gihapon nga magtinabangay alang sa kalambuan sa IEC nga dili garbo sa Sugbo apan lakip na sa Pilipinas.

Samtang nanawagan si Villarojo sa mga kandidato sa piniliay sa Mayo 9, 2016 nga dili ipasulabi ang kaugalingong interest.

Kini aron wala’y motumaw nga dili maayo’ng panghitabo ilabi na nga may dugoong panghitabo na sa Lungsod sa Dumanjug.

Pahinumdum ni Villarojo sa mga kandidato nga i-presentar ang ila’ng mga plataporma.

Lakip sa gipanawagan ang pagpatigbabaw sa kalinaw sa eleksiyon.

Matud ni Villarojo nga wala kaayo siya nasayud sa tinuoray nga panghitabo sa Dumanjug apan siya nanghinaut nga magpabilin ang kalinaw sa lungsod.

Si Arsobispo Jose Palma sa iya’ng bahin nibutyag nga kung aduna na gani’y mga bayolente nga binuhatan dili na kini makatarunganon.

Sama ni Villarojo, sumala pa sa Arsobispo nga mas maayo buhaton sa mga magpapili ang pagyagyag sa ila’ng mga programa ug kaayuhan nga ihatag ngadto sa katawhan ug respetuhon ang boto sa matag tawo.

Gitun-an karon sa Arsobispo ang pagpagawas og pastoral letter alang sa eleksyon. (Decemay P. Padilla ug Rowena D. Capistrano/GMR)(BANAT NEWS)