Daghan na ang nakatrabaho sa cv
CEBU, Philippines - Nitala ang Rehiyon 7 og labi’ng taas nga employment gains lukop nasud karong tuiga. Kini base sa labi’ng uwahing Labor Force Survey nga gipahigayon sa Philippine Statistics Authority (PSA).
Gikalipay hinuon ni Luchel Taniza, tigpamaba sa DOLE-7, ang resulta sa mao’ng survey.
Matud niya nga daku og natampo sa taas nga employment gains sa rehiyon mao ang ubay-ubay nga mga construction projects nga gipatuman, ma-publiko man o pribado nga proyekto.
Base sa resulta sa Labor Force Survey, niabot na sa 25.892 million ang labor force sa nasud gikan sa 24.720 million niadto’ng 2014 diin ang Rehiyon 7 nitala og 4 porsyento nga increase sa employment gains.
Sa Central Visayas, anaa na sa kapin sa 3.3 million ang labor force diin 3.1 million niini ang employed.
Gawas niini, ang pagpabilin sa industrial peace daku og ikatabang aron sa pag-agni sa mga investors nga mobubo og dugang puhunan.
Gani ang National Mediation and Conciliation Board-7 wala pa makatala og labor strike karong tuiga.
Naglaum hinuon si Taniza nga mapabilin nila ang momentum hangtud sa mga mosunod nga katuigan.
Lakip nga nakatampo sa pagtaas sa employment gains sa rehiyon ang BPO sector, pagpahigayon og jobs fair, ug uban pa.
Hinuon bisan pa man og napanglantawan nga makahatag og bati nga imahe ang nagkagrabe nga sitwasyon sa trapiko partikular sa Dakbayan sa Sugbo, apan sumala pa ni Taniza nga indikasyon usab kini sa paglambo sa usa ka dapit. (Decemay P. Padilla/GMR)(BANAT NEWS)
- Latest
