CEBU, Philippines - Gibasura sa Commission on Elections ang rehistrasyon sa 73 ka botante sa Lungsod sa Ginatilan tungod kay napakyas sila sa pagpamatuod nga mga residente sila sa lugar. Ang Election Registration Board nga gipangulohan ni Provincial Election Officer, Atty. Ferdinand Gujilde, niaprobar sa 20 lang ka aplikasyon.
Napulo niini ang nakahatag og dokumento sa pagmatuod nga residente sila sa barangay samtang ang laing napulo gisibog sa mga kapitan ang ila’ng petisyon human nasuta nga sila mga residente sa barangay. Sayo niini ang mga kapitan sa barangay Poblacion, Guianon ug Palanas nisang-at og reklamo batok sa 94 ka nagparehistro sa Comelec kinsa giingong dili mga residente sa ila’ng mga barangay.
Si Gujilde sa iyang bahin nipasabot nga buot niya’ng aprobahan ang tanang application tungod kay ang “ground” nga “lack of residence” premature kini diin iya’ng gibasehan nga ang “reckoning day” unom pa ka buwan sa dili pa ang eleksiyon ug dili ang registration.
Ang Oktubre 31 nga katapusang adlaw sa registration layo pa kaayo kini sa unom ka buwan sa dili pa ang eleksiyon.
“Ang kanang opposition is supposed to be premature,” matud ni Gujilde. Apan matud niya nga napilde siya sa botasyon hinungdan nga wala maaprobahi ang 73 kabuok nga nagparehistro.
Ang mga wala aprobahi pwede pa nga makaduso og “petition for inclusion” sa Municipal Trial Court aron dili sila matangtang sa voter’s list ug makapakita sila og dokumento pagmatuod nga mga residente sila sa lugar. (BANAT NEWS)