“Gag order” ni Davide gustong ipaklaro sa CCPC

CEBU, Philippines - Ang Cebu Citizens Press Council mipasar og resolusyon aron awhagon si Gob. Hilario Davide III ug ang Hunta Probinsyal nga klaruhon kun unsay limitasyon sa “protocol” nga gipasabot bahin sa memorandum nga giisyu ni Capitol Administrator Mark Tolentino.

Ang maong memorandum gipatuman sa tanang department heads sa lalawigan niadtong Nobiyembre 9, 2015 nga nagdili na kanila paghatag og kopya sa mga public records gikan sa ilang mga departamento ngadto sa publiko ug ilabi na sa media. Kadtong gustong mokuha og kopya niini, kinahanglan pa una nga mopadala og suwat ngadto sa department head aron kini aprubahan ug kinahanglang pahibaw-on usab ang buhatan sa gobernador bahin sa pag-release sa maong kopya.

Giisip ang maong memo nga sama og “gag order” sa gobernador. Apan giklaro ni Davide nga dili kini gag order kondili “mere protocol” lamang ug wa gyud nagpasabot nga di gyud sila mohatag og kopya sa dokumentong gipangayo.

Apan sumala pa sa resolusyon sa CCPC, ang maong memo way klaro kun unsang mga rekisitos ang dili mahimo aron dili mohatag og kopya sa dokumento. Niining paagiha daw adunay way kinutobang gahom ang department heads kun mohatag ba kini o dili.

Gawas pa niini, mahimo usab isipon nga ang memo nagpasabot usab nga dili na basta mahimong tubagon sa mga department heads ang mga pangutana sa media kun buot niya kining buhaton ilabi na niadtong mga sakop sa media nga kritikal kanila. Gusto sa CCPC nga tarungon ug mag-amping sa paggamit sa maong “protocol” ang department heads ug dili kini gamiton aron taguon ang kamatuoran nga angay mahibaw-an sa ngalan sa interes sa katawhan.

Adunay mga nagduda nga gihimo kini sa Kapitolyo nunot sa sagunson nga kontrobersya ug gidudahang may iregularidad nga mga kalihokang gihimo ang lalawigan nga napublikar sa media. Ang resolusyon iduso unya ngadto sa buhatan sa gobernador ug sa hunta aron ipadayag ang baruganan sa mga sakop sa media kabahin niini. ((BANAT NEWS)