Trapiko hinungdan sa pagpapili pagka-mayor
CEBU, Philippines - Wala’y nabuhat ang kasamtangang namunoan sa Lungsod sa Minglanilla sa problema sa trapiko hinungdan nga naaghat ang usa ka negosyante sa pagpapili sa pagka-mayor sa umaabot eleksiyon.
Matud niya nga ang suliran sa Minglanilla dili lang problema sa katawhan nga namuyo kun dili problema sa tibuok probinsya sa Sugbo kay ang mga tawo nga adunay negosyo o tuyo sa ubang lugar moagi man sa Minglanilla.
Si Cañares, 58-anyos, nahimo’ng mayor sa lungsod niadto’ng 1986 hangtud sa 1992.
Asoy niya nga kung siya nahatagan pa og daku-daku nga budget kaniadto hayan iya na’ng gibuhat ang pagpalapad sa karsada sa Minglanilla.
"Ako ni’ng gi-suggest sa kasamtangang mayor apan unsa ma’y iyang nabuhat? Wala!" sigun pa ni Cañares.
Iyang gipasalig nga kung siya ang matagaan og higayun nga mahimo’ng mayor pagbalik sa Minglanilla hayan iya’ng paningkamutan ang pagpalapad sa karsada ug maghimo og daghang access road.
"Unsa ma’y ilang nabuhat? Ang pag-ayo ra sa karsada. Igo na ba lang na?" dugang ni Cañares. Matud niya nga aduna’y reclamation project nga gihimo apan kun kini mag-operate hayan lain na sab nga problema sa traffic kay daghan na man unya nga mga sakyanan ang magdagan sa mao’ng lugar.
Asoy niya nga wala’y long term goal ang mga opisyal sa Minglanilla ug wala kini nila napanglantawan daan nga kung adunay development anaa sab dayun ang ka-traffic.
"Wala sila’y gihimo nga kasulbaran sa traffic kun dili sila nidungag sa problema," asoy ni Cañares.
Iyang nakita nga seryoso ang problema sa traffic kay kini mokanit-kanit man sa nagkalain-laing problema sama sa peace and order, economic issue ug uban pa.
"So, kanus-a man nato buhaton ang problema nga giatubang sa Minglanilla? Wala na’y laing panahon kun dili karon na," dugang pa ni Cañares. Si Cañares ang makig-atbang ni Mayor Elanito Peña sa pagka-mayor sa sunod tuig nga eleksiyon. (BANAT NEWS)
- Latest
