CEBU, Philippines – Napangos sa tuhod ug kamot ang usa ka babaye human gilabni ang iya’ng bag sa duha ka wala mailhi’ng lalaki nga luwan sa motorsiklo sa niagi’ng Lunes sa hapon sa Kagudoy, Basak, Dakbayan sa Lapu-Lapu.
Si Cleofe Anto, 36-anyos, accounting head sa usa ka water technology company, ang nakuhaan og P28,000 nga kwarta, tulo ka passport, upat ka bank books ug duha ka cellphones nga nagkantidad og P20,000 ug P7,000.
Sa inisyal nga pakisusi ni PO2 Neeron Sarzuelo sa Basak- Marigondon Police Station, naglingkod ang biktima luyo sa drayber sa tricycle padulong pauli sa Pacific Villa 1 sa Barangay Pajac gikan sa trabahoan.
Samtang nagbiyahe, usa ka motorsiklo nga gisakyan sa duha ka lalaki ang niapas sa gisakyang traysikol ug kalit gilabni ang bag sa biktima.
Dugang sa polis nga natagak ang biktima gikan sa traysikol hinungdan nga nakaangkon kini og samad sa tuhod, kamot ug taas nga bahin sa iya’ng lawas.
Nagkanayon si Sarzuelo nga si Anto gikatakda nga molarga sa laing nasud kagahapon apan wala mahinayon tungod sa nahitabo’ng insidente samtang ang kwarta nga P28,000 ang posible’ng gamiton unta sa paglarga. – /GMR) (BANAT NEWS)