CEBU, Philippines – Gawas sa gipahugtan nga seguridad sa Youth Day atol sa International Eucharistic Congress 2016 sa Dakbayan sa Lapu-Lapu, gipahugtan sab ang seguridad sa mga simbahan alang sa Misa de Gallo nga magsugod karong Disyembre 16.
Nagkanayon si Senior Superintendent Armando Radoc, acting director sa Lapu-Lapu City Police Office, nga ipakatap niya ang mga polis gikan sa matag police station sa siyudad ug mga pinili’ng sakop sa LCPO Headquarters.
"All these Yuletide Season-related activities will be fully covered," matud ni Radoc.
Dugang niini, magbutang og police assistance desk sa matag simbahan nga dali’ng makit-an sa publiko.
Pahimangno ni Radoc sa publiko nga magpabiling alerto ug magmabinantayon batok sa "salisi gang" nga gikataho’ng nakapiyansa sa ila’ng gibuhat nga krimen sa mga niagi’ng buwan.
"Alerto gyud ta ana, mo-distribute og leaflets aron makahatag ta og public awareness kay kani sila (mga salisi) mangita gyud ni sila og opportunity to commit the crime," dugang ni Radoc. Una’ng nisaysay si Radoc nga ang dakbayan gipaubos sa heightened alert diin wala’y gitugutan nga polis nga maka-file og leave alang sa paghatag og dugang seguridad sa mga residente.
"We will be connecting with the barangays (Barangay Peacekeeping and Safety Officers) plus all-out nightly patrol," dugang ni Radoc. – /GMR) (BANAT NEWS)