P250M deal gikwestiyon ni maambong
CEBU, Philippines – Gikwestiyon ni kanhi bokal Victor Maambong ang pagdali-dali sa Kapitolyo sa pag-award sa P250 milyones nga pagpalit sa heavy equipment ngadto sa highest bidder.
Matud ni Maambong nga wala hatagi sa Bids and Awards Committee og “due process” ang laing duha ka bidders nga nitanyag sa mas ubos nga presyo sama sa RDAK Transport nga P235 milyones ug Civic Merchandising nga P237 milyones.
Ang BAC nideklarar hinuon sa ConEquip Phils. nga nitanyag og P250 milyones ug na-disqualified pa sa una’ng hugna sa bidding.
Gibasura sa BAC nga gipangulohan ni Provincial Administrator Mark Tolentino ang una’ng gipangayo nga rekonsiderasyon sa RDAK ug gipangitaan og laing sipyat sama sa kapakyas sa pagduso sa tax clearance sa partner niini nga NS Lee Construction.
Si Maambong kinsa magpapili pagbalik sa pagkasakop sa hunta probinsiyal ubos sa One Cebu Party niingon nga dili husto ang gihimo sa BAC nga gibase lang sa website sa Bureau of Internal Revenue ang record sa kompaniya.
Matud ni Maambong nga ang korte mohimo pa man gani og ocular inspection aron pagsuta sa ebidensiya.
Pangutana karon ni Maambong kung ang ConEquip nakakompleto ba sa mga dokumento nga gipangita sa BAC sa ubang bidders ug kung asa ang ila’ng service center sa mga sakyanan nga paliton sa Kapitolyo. – /GMR) (BANAT NEWS)
- Latest
