Austrian naghikog, lawas ipa-donate

CEBU, Philippines - Patay ang usa ka Austrian human kini naghikog pinaagi sa pag-um-om sa .45 calibre nga pistola sa Barangay Basdiot, Lungsod sa Moalboal pasado alas 9 kagahapon sa buntag.

Ang naghikog patay mao si Eduard Halbwachs, 68-anyos, halos 19 ka tuig na nga nagpuyo sa mao’ng dapit.

Matud ni Police Officer 1 Niño Ridaza, desk officer sa Moalboal Police Station, nga kagahapon sa buntag kuyog pa sa langyaw ang iya’ng asawa nga nangape sa iya’ng terrace apan pagkataud-taud, nanaug kini sa balay paingon sa ila’ng sakyanan.

Pipila ka minutos ang nilabay, usa ka lanog sa buto sa armas ang nadungog ug sa pagsubay sa ila’ng katabang nagbuy-od na sa yuta ang langyaw nga naligo sa iya’ng dugo.

Si Ridaza niingon nga wala nasayud ang asawa sa langyaw nga si Gertrude, usa ka Pinay, nga aduna ba’y armas ang iya’ng bana nga gidudahan sa kapolisan nga wala’y lisensya.

Sa pagsubay sa mga polis ila’ng nahibaw-an nga dunay sakit nga vertigo illness o sakit sa ulo ang langyaw nga dugay na niya nga gidala-dala ug lagmit kini ang hinungdan sa iya’ng paghikog.

Nasayran pa sa kapolisan nga niadto’ng Nobiyembre naghimo na diay og legal o living well ang langyaw nga kung ugali’ng siya mamatay, iya’ng ipa-donate ang tibuok lawas sa Cebu Doctors Hospital aron magamit sa mga educational experiment.

Ang maong testamento pirmado sa langyaw ug notaryado sa abogado.

“Mura’g nagmirida na gyud ni siya sir kay nagpahimo naman siya og legal will, among gisubay sa asawa naa gyud sir, notarized pa gyud, hasta ang iya’ng amigo nga naa sa gawas iya pud nga gi-ingnan nga basin dili na daw sila magkita,” matud ni Rizada.  (BANAT NEWS)