CEBU, Philippines – Makadawat og pinaskuhan nga tag P500 ang mokabat 6,000 ka senior citizens sa dakbayan sa Talisay.
Kini human giaprobahan sa konseho ang resolusyon nga giduso ni Konsehal Socrates Fernandez, chairman sa committee on social Service.
Matud ni Fernandez nga kadto’ng mga senior citizens nga narehistro sa siyudad ang makadawat sa pahalipay nga magamit karong Pasko.
Si Konsehal Doroteo Emit nibutyag nga angay nga klaruhon sa resolusyon nga kausa ra kini ihatag niini’ng tuiga isip Christmas gift.
Giklaro ni Bise Mayor Romeo Villarante nga aron dili makwestiyon sa Commission on Audit, angay nga ibutang nga cash assistance ang termino nga gamiton.
Dugang ni Villarante nga dili na kinahanglan pa ang supplemental budget aron kini mahatag tungod kay nalakip na sa 2015 annual budget ang pundo.
"Angay lang gyud ni’ng gamiton ug ihatag sa siyudad isip pahalipay sa mga katiguwangan," matud ni Villarante. – /GMR) (BANAT NEWS)