Hospital, simbahan gikawatan

CEBU, Philippines – Kapin sa P12 mil ug usa ka kahon nga anti-psychotic drugs ang nakuha sa kawatan nga nilungkab sa opisina sa chief of hospital sa Pinamungajan District Hospital nga nadiskubrehan pasado alas 10 sa niagi’ng buntag.

Sumala pa ni Police Officer 1 Ian Patrick Carvillida, desk officer sa Pinamungajan Police Station, nga nakadawat na lang sila og tawag pakitabang sa district hospital tungod kay gilungkab ang opisina ni Dr. Feleus Bascon.

Matud niya nga aduna na’y gitan-aw nga suspek ang kapolisan apan nagdumili siya sa paghingan basin makabantay ug gitumbok nga notado na sa lugar.

Sumala pa ni Carvillida nga sa pagsusi sa ila’ng kaubanan, ang suspek niagi sa bintana sa kasilyas sa opisina ni Bascon piaagi sa paggunting sa screen ug giguba ang bintana dayong sulod sa opisina.

Giguba sa suspek ang drawer nga may sulod usa ka box sa anti-psychotic drugs nga isyu gikan sa Department of Heath, P12 mil nga salapi ug mga payment slips sa mga pasyente.

Samtang gilungkab sa wala ilhi’ng kawatan ang usa ka simbahan sa laing relihiyon sa Barangay Poblacion, Dakbayan sa Toledo.

Si Erwin Arnido, 34, usa ka pastor nga nagpuyo usab sa mao’ng simbahan ang biktima sa pagpanglungkab.

Sa imbestigasyon sa kapolisan nasayran nga naguba na ang koral sa simbahan ug gitangtang ang jalousie sa bintana nga posible’ng mao’y giagian sa suspek.

Nawagtang ang kwentas, microphone, mga resibo ug P4 mil nga cash. (BANAT NEWS)