Papeles sa earth-balling kuwang

CEBU, Philippines – Nakit-an sa Department of Environment and Natural Resources ang depektuso ug kakuwangon sa mga dokumento nga giduso sa Cebu City Government labot sa ila’ng tinguha nga pag-earth-ball sa 15 ka punoan sa kahoy sa Pope John Paul Avenue.

Ang tigpamaba sa DENR-7, Eddie Llamedo, niingon nga base sa ila gihimo’ng evaluation, wala’y mga representante gikan sa simbahan, civic organizations ug environmental groups sa gihimo’ng public consultation ug kini giingong gitambungan lang sa mga kawani sa City Hall.

Sigun pa ni Llamedo nga ila’ng nasayran ang Archdiocese of Cebu nipadayag og pagsupak sa pagtangtang sa mga punoan sa kahoy nga gilangkuban sa 11 ka fire tree ug upat ka mahogany hinungdan nga angayan lang sila imbitahon sa public consultation.

Gawas sa mao’ng mga kakulian, ang Barangay Lus pa lang usab ang nakaduso og certification of no opposition ug wala pa maka-isyu sa mao’ng dokumento ang Barangay Kasambagan nga apektado usab niini ingon man wala’y endorsement ang Department of Public Works and Highways gikan ni Secretary Rogelio Singson.

Si Llamedo niawhag sa kagamhanan sa Dakbayan sa Sugbo sa pagkorehir ug pag-comply sa mga dokumento aron ka-isyuhan sila og permit sa pag-earthball sa mga punoan sa kahoy. (BANAT NEWS)