3 sa ’nangambus’ nasikop

CEBU, Philippines – Tulo na ka tawo nga gidudahang apil sa mga mibanhig sa grupo ni Dumanjug Vice Mayor Efren Gica kaniadtong Biyernes sa hapon ang nadakpan sa kapolisan ug gipangita pa ang ilang kaubanan.

Ang unang gidakop kaniadtong Biyernes sa gabii mao si Dexter James Aniñon, 18-anyos, nga maoy gitumbok nga “lookout” sa grupo.

Nadakpan usab sa follow-up operation sa kapolisan kagahapon mao sila si Joselito Quirante Gicale, 35, taga Barangay Pawa ug Samuel Villagonzalo, 31, taga Barangay Sima.

Si Gicale giingong nakuhaan og replica sa M4 nga armas, usa ka 40 milimeter nga M203, usa ka pinute, unom ka paketeng shabu ug kahimanan sa paghingos og shabu.

Ang laing dinakpan nga si Villagonzalo nakuhaan og kalibre 45 nga pistola nga may lima ka bala, usa ka granada, walo ka pakete nga shabu ug usa ka wig.

Si Senior Inspector Arvi Arbuis, hepe sa Dumanjug Police Station, miingon nga misukol si Villagonzalo diha nga ilang gidakop mao nga naglayogay sila usa pa kini madakpi.   

Padayon pa ang kapolisan sa Dumanjug sa pagpangita sa mga kauban sa tulo ka dinakpan nga ang lima nailhan na sa kapolisan. Duna pay laing mga kauban sa grupo sa pagpamanhig nga wala pa nila mailhi.

Malaumon hinuon si Arbuis nga mailhan ug ila ra kining madakpan kay aktibo ang mga lumolupyo sa kabukiran sa Dumanjug nga nakig-alayon sa kapolisan aron masikop ang mga responsable sa pagpamanhig.

Si Vice Mayor Gica miingon nga ang pag-ambush kanila didto sa Barangay Masa posible nga may kalambigitan gyud sa politika.  Si Gica milansar pagka mayor sa Dumanjug ubos sa Partido Liberal ug atbangan niya si Mayor Nelson Garcia nga kaalyado sa One Cebu Party.

Matud sa mayor nga klaro kaayo nga drama lang ang gikataho nga pag-ambush sa grupo nila ni Gica bisan og nakaangkon og kadaot ang sakyanan ni kanhi konsehal Rene Asentista nga nabuthan sa granada.

Si Asentista maoy ka-tandem ni Gica sa paglansar pagka bise mayor sa Dumanjug. Gibanhigan sila sa mga armadong tawo pagbiya nila didto sa Barangay Masa nga gihimoan nila sa pulong-pulong kaniadtong Biyernes sa udto.

Si Mayor Garcia wala malipay sa pamahayag ni Senior Inspector Arbuis nga adunay posibilidad nga politically motivated ang hitabo ug irekomendar nila nga ang Dumanjug madeklarar nga political hotspot sa umaabot nga eleksyon.

Matud ni Gica nga mohimo siya og lakang nga pahulipan ang hepe sa kapolisan sa Dumanjug. Matud ni Garcia nga buhat-buhat ra sa mga Gica ang hitabo kay nakadawat siya og report nga ang bodyguard ra sa bise mayor ang mipabuto ug gipatuo nga sila gi-ambush.

Ang mayor miingon nga gusto gyud ni Gica nga ang Dumanjug madeklarar nga Comelec Area of Concern o hot spot area aron makontrolar nila ang lugar. Giawhag sa mayor si Gica nga kun makig-atbang gyud kini kaniya angay nga magtinarong ug magbuhat og maayo, nungka nga hadlokon ang katawhan.

Samtang gihulagway ni Gica nga sakit kaayo ang pamahayag sa mayor nga sila pa ang biktima sa pag-ambush ug sila pa ang giyagayagaan.

Gidasig ni Gica ang kapolisan nga hingusgan ang pagpahigayon og checkpoint aron mapugngan ang paglihok sa mga armadong tawo nga gituohang mga goons.

Si Gica miingon nga 99 porsiyento na nga siya nagtuo nga ang pagbanhig kanila may kalabotan gyud sa politika.  (BANAT NEWS)