CEBU, Philippines - Sugdan sunod semana ang pag-reblock sa mga nasunugan sa Doña Maria Village Extension 1, Punta Princesa, Dakbayan sa Sugbo.
Matud ni Division of the Welfare for the Urban Poor (DWUP) Community Officer Robert Barquilla nga apilon og re-block ang anaa nahimutang sa atubangan diin maapektuhan sa plano nga pagbutang sa dalan sa mao’ng dapit.
Gipasalig ni Barquilla nga wala’y ma-relocate sa mao’ng dapit ug mahatagan gyud og pwesto ang tanan nga biktima sa sunog nga mokabat sa 82 ka pamilya ug 340 ka indibidwal kinsa kasamtangang gipahiluna sa simbahan sa Mormons ug Punta Princesa Gym.
Gibutyag ni Portia Basmayor sa Department of Social Welfare Services nga kutob lang sa Sabado sa buntag ang mga nasunugan sa simbahan tungod kay gamiton man sa ila’ng pag-worship hinungdan ang mga nasunugan ipahimutang na usab ngadto sa Punta Elementary School.
Ang konseho sa barangay nideklarar na ubos sa state of calamity sa nasunugan diin 35 ka panimalay ang hingpit nga naugdaw ug siyam ang partially damaged. Matud ni Kapitan Jose Navarro nga gamiton nila ang P250 mil sa ila’ng calamity fund alang sa paghatag og financial assistance, housing materials ug pagkaon sa mga pamilya nga nasunugan. Ila pa’ng susihon kung tagpila ang ila’ng mahatag.
Samtang ang mga nasunugan sa Sitio Abbya ug Puntod, Mambaling niadto’ng Nobiyembre 17 nangindahay na nga makabalik sa ila’ng kanhi gipuy-an sa dili pa ang Pasko.
Matud ni Beatrize Villarino, kinsa nagpuyo sa tulda, nga pait kaayo ang ila’ng kahimtang ilabi na kung ulan kay mapugwat man sila sa ila’ng katulogon.
Si Bernadette Perez, presidente sa Abbya Puntod Homeowners Association, nipadayag nga maayo unta nga padayunon ang original survey plan aron wala’y mahawa nga mga residente nga biktima sa sunog.
Si Kapitan Wilfredo Go nibutyag nga pabor usab siya nga ibalik lang ang naandan nga sukod sa lugar aron dili daghan ang mawagtangan og panimalay. (Sheriza Mae R. Uy ug Rowena D. Capistrano/GMR)(BANAT NEWS)