Convoy ni VM Gica gi-ambush

CEBU, Philippines - Gibanhigan sa mga armadong tawo ang grupo ni Dumanjug Vice Mayor Efren Guntrano Gica kagahapon sa hapon pipila ka gutlo human sila mibiya sa gipahigayong pulong-pulong didto sa Barangay Masa, usa ka bukid nga barangay sa lungsod.

 Wala hinuon maunsa ang bise mayor apan ang M79 rifle grenade diha g’yud mibuto kilid sa Pajero nga gisakyan ni kanhi Konsehal Rene Asentista nga maoy ka- tandem ni Gica sa pagka bise mayor.

Si Gica makig-atbang ni Mayor Nelson Garcia nga magpa-reelect sa katungdanan sa eleksyon karong sunod tuig. Walay nahitabo ni Asentista apan ang sakyanan nga iyang gisakyan maoy nakaangkon og kadaot.

Matud ni Gica nga dihang nakabiya na sila og mga 25 metros gikan sa dapit nga gihimoan sa tigum, kalit lang nga nakadungog sila og buto-buto sa armas ug mura’g girakrakan ang ilang convoy.

Si Gica wala na pabalika pa sa iyang mga security ug nanawag na lang sila og mga polis. Nagtuo gyud hinuon si Gica nga siya maoy target sa mga armadong tawo.

Mga 20 ka tawo ang grupo nila ni Gica ug Asentista, apil ang tulo nga magpapili pagka konsehal sa lungsod, nga mihimo og pulong-pulong sa covered court didto sa Barangay Masa.

Dunay nagtuo nga ang motibo sa pagpamanhig mao ang higpit nila nga panagribal sa politika tali ni Mayor Garcia, apan matud ni Gica nga mas nagtuo siya nga ang aktibo niya nga pagkampanya sa ilegal nga drugas maoy posible ‘sab nga rason.

Si PO1 Loreniel Labasa sa Dumanjug Police Station miingon nga adunay nakatug-an kanila nga usa ka Nilo Quirante ang apil sa mihimo sa pagpamusil.

Matud ni PO1 Labasa nga notado na sa ilang buhatan si Quirante ug gani nakapasaka na sila niini og kaso sa iyang kalambigitan sa ilegal nga drugas ug gipaabot na lang ang warrant aron kini dakpon.

Usa ka granada nga wala makabuto ang narekober sa kapolisan didto sa dapit nga nahitaboan.

Giangkon ni Gica nga nabalaka na karon siya sa iyang siguridad tungod kay dili man usab masalindot ang posibilidad nga ang pagbanhig may kalabotan sa politika.

Apan kun si Mayor Garcia ang pasultihon ang giingong pagpamanhig usa ka “desperate move” sa kampo ni Gica ug klaro kaayo nga usa lang kini ka drama aron maluoy ang mga tawo ngadto kaniya.

Matud sa mayor nga wala sa kinaiya sa mga Garcia ang paghimo og kriminal nga kalihukan tungod lang sa politika kay mosubay gayud sila sa balaod.

Samtang si Senior Inspector Arvi Arbuis, hepe sa kapolisan sa Dumanjug, mibutyag sa DYLA nga usa sa mga armadong tawo nga miambus nailhan na nila kay adunay nakaila ug nakatug-an kanila.

Ang uban hinuon sa mga armadong tawo nagtaptap sa ilang panagway mao nga wala pa nila kini mailhi. Wala pa mobutyag ang hepe kun tawo ba sa politiko ang kauban sa nag-ambush nila ni Gica nga ila na nga nailhan.

Si Arbuis miingon nga irekomendar nila ngadto sa Cebu Provincial Police Office (CPPO) nga ideklarar ang Dumanjug nga Area of Concern kon “election hotspot” tungod sa init kaayong panagribal sa politika ug sa presensya sa mga armadong tawo.

Matud ni Gica nga kun himoon nga “political hot spot” ang ilang lungsod karong umaabot nga eleksyon dili siya mosupak alang sa kahapsay sa umaabot nga eleksyon. (Decemay P. Padilla ug Jojo C. Ugdol/RUB)(BANAT NEWS)