CEBU, Philippines - Usa ka recruitment agency ang gustong ipaimbestigar sa Konseho sa Dakbayan sa Sugbo tungod sa reklamo sa duha ka mga Overseas Filipino Workers (OFW) nga nagpatabang human nabiktima sa pag-abuso didto sa Middle East.
Matud ni Konsehal Nestor Archival sa iyang privilege speech adunay duha ka mga Cebuana nga taga Cebu City ug taga amihanang bahin sa Sugbo ang nagpatabang human sila nakasinati og pag-abuso ug pagpanglugos gikan sa ilang mga agalon didto sa Saudi Arabia.
Ang usa kanila nga 37-anyos nga taga Cebu City, usa ka single mother ug adunay gibuhi nga usa ka anak mibutyag nga nanimpalad siya nga makatrabaho sa abroad ug girekrut sa usa ka ahensya nga gituohan niyang lehitimo.
Matud niya naengganyo siya human gipasaligan sa ahensya nga protektado siya kun adunay aksidente nga mahitabo kaniya didto sa Saudi Arabia tungod aduna silay mga partners nga ahensya didto ug konektado sila sa Philippine Overseas Labor Office (POLO).
Way day-off
Apan matud pa niya wala motuman ang ahensya sa proteksyon nga ilang gisaad tungod kay gimaltrato siya sa una niyang amo pinaagi sa pagpatrabaho gikan alas-singko sa buntag hangtud ala-una sa kaadlawon ug kausa ra siya pakan-on sa usa ka adlaw ug way dayoff kay ipasapasa siya sa ubang amo.
Dihang nisumbong siya sa partner nga ahensya sa recruitment agency giingnan lang siya nga antoson lang usa tungod kay anaa pa siya sa provisionary period, ug wa siya tuguting makabalhin og laing amo kay kinahanglang humanon niya ang iyang kontrata sa iyang unang amo.
Niabot sa punto nga gipusdak niya ang gamit sa iyang amo ayha pa siya gihatud ngadto sa ahensya. Gikan didto, gibalhin siya og laing amo nga way kontra apan matud pa niya mas arang-arang apan wa gihapoy day-off.
Gimolestiya
Paglabay sa pipila ka bulan, nibakasyon ang iyang amo ug gibilin siya ngadto sa babayeng igsuon sa iyang amo apan didto pirme siyang molestiyahon sa bana niini. Pinaagi sa tabang sa anak sa iyang amo nakatawag siya sa iyang igsuon dinhi sa Sugbu ug sa ahensya nga nirekrut kaniya ug mipasalig sila nga i-rescue siya, apan wala kini mahitabo.
Dihang iyang gitawgan ang embahada sa Pilipinas sa Saudi gitambagan siya nga paeskapuhon na lang sa balay sa iyang amo kay adunay mosugat kaniyang lalaki diha sa gawas nga modala kaniya sa embahada.
Giilad pag-usab
Gihatagan siya og return ticket ug nakauli dinhi sa Pilipinas ug diretso siyang gidala sa buhatan sa recruitment agency didto sa Manila gipapirma siya og “walk-in settlement” ug tungod sa iyang kaagi ug kalibog sa nahitabo, nipirma siya nga wala mobasa sa nakasuwat niini ug wala usab siya esplikari sa unod niini kay gusto na siyang makauli og Sugbo.
Diay to, ang uwahi na niyang nabantayan nga nailad siya sa ahensya ug dihang mireklamo siya giingnan lang siya nga angay pa siyang magpasalamat nga naka-‘survive’ siya.
Tungod niini, nidangop siya sa Overseas Workers Welfare Administration aron moreklamo.
Duna pay lain
Matud pa ni Archival, lain pang taga Cebu City ang nagpabilin pa karon didto nga nakasinati gihapon og susama sa giagian sa 37-anyos nga single mother. Ug aduna pay laing usa ka taga probinsya sa Sugbo nga mas grabe pa ang giagiang malaw-ay nga pag-abuso nga nakauli na dinhi.
Ang tulo pulos na-rekrut sa pareho gihapong recruitment agency maong gusto karon sa Konseho nga paimbestigahan ang maong kompanya.
Ang konseho mopahigayon og executive session diin ipatawag ang mga representante sa gireklamong recruitment agency, OWWA, POLO sa Riyadh ug Philippine Embassy sa Saudi Arabia, Department of Labor and Employment (DOLE), Department of Foreign Affairs (DFA) ,NGOs, Gabriella, Lihok Filipina Foundation INC, Department of Social Welfare Service (DSWS) ug Department of Social Welfare Development (DSWD) aron pagtuki sa maong reklamo.
Ang chairman sa Committee on Family and Women Konsehal Lea Japson miingon nga kinahanglang ipaubos sa stress debriefing ang mga biktima. (BANAT NEWS)